ԵԱՀԿ-ն խիստ մտահոգված է ոստիկանության ՊՊԾ գնդի գրավման շուրջ ծավալվող իրադարձություններով: Այս մասին NEWS.am -ի հարցին ի պատասխան ասել է ԵԱՀԿ երեւանյան գրասենյակի ղեկավար դեսպան Արգո Ավակովը:
ՊՊԾ գնդի գրավման շուրջ ստեծված իրավիճակը մեկնաբանելու՝ գործակալության խնդրանքին ի պատասխան՝ դեսպանը ասել է. «Մենք կիսում ենք բռնության դատապարտումը պաշտոնատար անձանց, քաղաքական կուսակցությունների, քաղաքացիական հասարակության, կրոնական ու մշակութային առաջնորդների ու միջազգային սուբյեկտների կողմից: Մենք ցավում ենք ոստիկանության աշխատակցի զոհվելու կապակցությամբ ու մեր ցավակցությունն ենք հայտնում զոհվածի ընտանիքին: Մենք ցանկանում ենք շուտափույթ ապաքինում նրանց, ովքեր տուժել են այս իրադարձություններից»:
Դեսպան Ավակովը կոչ է արել անհապաղ ու առանց նախապայմանների ազատ արձակել բոլոր պատանդներին:
«Իրավիճակը պետք է հանգուցալուծվի ու հասարակական կարգը պետք է վերականգնվի օրենքի գերակայությանը համապատասխան: Մենք բոլոր շահագրգիռ կողմերին կոչ ենք անում առավելագույն զսպվածություն դրսեւորել: Մենք ուշադիր հետեւում ենք՝ Էրեբունի թաղամասում կատարվող իրադարձությունների կապակցությամբ սկսված ցույցերին՝ այդ թվում ոստիկանների գործողություններին: Հասարակական կարգը պետք է վերահսկվի իրավունքի գերակայության սկզբունքներին ու հիմնարար իրավունքների նկատմամբ հարգանքին համապատասխան: Զագվածային միջոցառումների, ցույցերի ու հանրահավաքների անցկացման ժամանակ մարդու իրավունքների ապահովումը իրավակարգի ժողովրդավարական պաշտպանության արմատական տարրն է, ինչը խրախուսում է ԵԱՀԿ-ն»:
Նա հիշեցրել է, որ ԵԱՀԿ երեւանյան գրասենյակի մանդատը նախատեսում է աջակցություն ԵԱՀԿ պարտականությունների կատարմանը, այդ թվում այն պարտականությունների, որոնք վերաբերում են մարդու իրավունքներին ու հիմնարար ազատություններին:
«Երեւանում ԵԱՀԿ գրասենյակը սերտ գործընկերային կապեր է հաստատել հայաստանյան իշխանությունների ու քաղաքացիական հասարակության կառույցների հետ: Գրաասենյակը պատրաստ է նրանց խնդրանքով օգնություն տրամադրել՝ իր մանդատի գործողությանը ենթակա ցանկացած հարցի շուրջ կոնտակտներ, երկխոսություն ու համագործակցություն հարթելուն աջակցելու համար:
Իր մանդատին համապատասխան՝ Երեւանում ԵԱՀԿ գրասենյակը աջակցում է ՀՀ իշխանություններին ԵԱՀԿ պարտավորությունների կատարման գործում: Այդ կապակցությամբ գրասենյակը համագործակցում է իրավապահ կառույցների հետ՝ ամրապնդելու համար նրանց ներուժը ժողովրդավարական իրավակարգի՝ այդ թվում զագվածային միջոցառումների, հանրահավաքների ու ցույցերի ընթացքում հասարակական կարգի պահպանման ժամանակ հիմնական իրավունքների պաշտպանության ոլորտում:
Նախորդ միջոցառումները ներառել են ճգնաժամային իրավիճակներում բաակցություներ վարելու առաջատար փորձի փոխանակություն: ԵԱՀԿ-ն նպաստել է ոստիկանության ու քաղաքացիական հասարակության միջեւ տեսակետների փոխանակությանը՝ հասարակական կարգի կառավարման հարցում մոտեցումների վերաբերյալ ու միշտ պատրաստ է անել դա »,- շեշտել է ԵԱՀԿ գրասենյակի ղեկավարը:
