Ի աջակցություն «Սասնա ծռեր» խմբի Երեւանի փողոցներով անցնող երթը հասել է Ֆրանսիայի հրապարակ: (ֆոտոռեպորտաժ)
NEWS.am-ի թղթակցի փոխանցմամբ, երբ երթի մասնակիցները հասել են հանրապետության հրապարակ եւ վանկարկումներ արել կառավարության հասցեին, «Հակաճգնաժամային նախաձեռնող խորհրդի» անդամ Ալբերտ Բաղդասարյանը հայտարարել է, թե բարձրանում են Նալբանդյան փողոցով՝ դեպի Ազատության հրապարակ: Շատերը վրդովվել են, պահանջել երթ անել դեպի Խորենացի փողոց, սակայն Բաղդասարյանն անդրդվելի է եղել եւ երթը տարել է իր ասած ուղղությամբ:
Երթի մասնակիցները վանկարկումներ են արել ԱԱԾ շենքի մերձակայքում, Սայաթ-Նովա փողոցով շարժվել դեպի Ֆրանսիայի հրապարակ: Այնտեղ նրանք կանգնել եւ փակել են երթեւեկությունը: Ցուցարարները որոշել են նստացույց անել եւ փակել Բաղրամյան պողոտայի սկզբնամասը:
Երեւանի ոստիկանապետ Աշոտ կարապետյանի գլխավորությամբ ոստիկանական ուժեր են տարվել Բաղրամյան պողոտա:
Նշենք, որ ոստիկանությունը երեկ՝ հուլիսի 29-ին ուժ կիրառեց Սարի թաղում եւ խորենացի փողոցում հավաքված ցուցարարների նկատմամբ: 165 մարդ բերման է ենթարկել, 73 անձ տեղափոխվել է հիվանդանոց: Ոստիկանական գործողություններից տուժել են նաեւ մեկ տասնյակ լրագրողներ: Քաղաքացիական հագուստով ոստիկանները կոտրել եւ խլել են NEWS.am-ի տեսախցիկը: