Սարի թաղում զանգվածային անկարգություններ կազմակերպելու կասկածանքով հուլիսի 29-ին ձերբակալված  «Նոր Հայաստանի» անդամ Անդրիաս Ղուկասյանին դեռ մեղադրանք չի առաջադրվել: Այս մասին NEWS.am-ը տեղեկացավ նրա փաստաբան Լուսինե Սահակյանից: Նա նշեց, որ իր պաշտպանյալի հանդեպ բռնություն է գործադրվել, որի հետեւանքով նա  ոտքերի շրջանում վնասվածքներ ունի, նաեւ ռենտգեն հետազոտության կարիք կա, որը  չի արվում:

Ավելի վաղ NEWS.am-ը հայտնել էր, որ հուլիսի 29-ի երեկոյան Խորենացի փողոցում եւ Սարի թաղում ոստիկանությունն ուժային գործողությունների է դիմել: ՊՊԾ գնդի առջեւ գտնվող տարածքը (Սարի թաղ) ազատելու մասին նախազգուշացումից հետո ոստիկանությունը հատուկ միջոցներ է կիրառել, հարձակվել մարդկանց վրա։ Պաշտոնական տվյալներով, 60-ից ավելի մարդ մարմնական վնասվածքներ է ստացել եւ տեղափոխվել հիվանդանոցներ: Ակցիայի ընթացքում նաեւ բազմաթիվ լրագրողներ են տուժել:

Ոստիկանության փոխանցմամբ բերման է ենթարկվել 165 մարդ, որից 26-ը ձերբակալվել են: Ձերբակալվածների թվում է նաեւ Անդրիաս Ղուկասյանը: