«Սասնա ծռեր» խմբի անդամներին հուլիսի 26-ին իր մեքենայով ՊՊԾ գունդ սնունդ հասցրած Արթուր Սարգսյանի մեղադրանքի փոփոխությունից հետո նրա խափանման միջոցը պետք է նույնպես փոխվի: Այս մասին այսօր՝ օգոստոսի 9-ին, լրագրողների հետ հանդիպմանն ասաց փաստաբան Տիգրան Եգորյանը, որն ընդգրված է «Սասնա ծռերի» պաշտպանությունն իրականացնելու համար ստեղծված փաստաբանների խմբում:
«Արթուր Սարգսյանն այժմ մեղադրվում է օժանդակելու մեջ, մեղադրանքը փոխվեց, ինչը նշանակում է, որ այն հոդվածներով, որով նրան կալանավորել են, դրա հիմքերը վերացել են, վերաքննիչ դատարանն արդեն պետք է քննարկի այս մեղադրանքի վերաբերյալ հիմնավոր կասկածը»,- ասաց փաստաբանը:
Նշենք, որ Արթուր Սարգսյանը Երեւանի բնակիչ է, մասնագիտությամբ մանկավարժ, երկար տարիներ աշխատել է Մանկավարժական համալսարանում ֆիզիկա է դասավանդել: Նա նաեւ լավ փորագրիչ է, իր աշխատանքներն է վաճառում Վերնիսաժում: Արթուր Սարգսյանն ապրում է միայնակ, ունի դուստր, որը բնակվում է ԱՄՆ-ում: Արցախյան ազատամարտի մասնակից է, այդ տարիներին էլ նա սնունդ է հասցրել առաջին գծում կռվողներին: