Հայաստանի ազգային հավաքականի կիսապաշտպան եւ Երեւանի «Փյունիկի» ավագ Դավիթ Մանոյանը պաշտոնապես տեղափոխվեց Կիպրոսի «Կարմիոտիսս»: NEWS.am-ի թղթակից Վերա Մարտիրոսյանի հետ զրույցում ֆուտբոլիստը պատմեց, թե ինչու ընտրեց կիպրոսյան թիմը եւ ինչու «Փյունիկը» բաց թողեց իր առաջատար ֆուտբոլիստներին:
Դավիթ, քո տեղափոխությունը վաղուց էր հասունացել: Գիտեինք, որ այս ամռանը անպայման պետք է գնաս: Մի քանի այլ տարբերակներ էլ էին շրջանառվում: Ինչպե՞ս եղավ, որ կանգնեցիր հենց Կիպրոսի տարբերակի վրա:
Ուրիշ առաջարկները պարզապես խոսակցություններ էին եւ «Փյունիկին» կոնկրետ առաջարկ չէր եղել: Ժամանակը քիչ էր եւ սա շատ լավ տարբերակ էր, քանի որ Կիպրոսի առաջնությունը բավական լավն է: Այդ պատճառով երկար չսպասեցի ու ընդունեցի առաջակը:
Ի՞նչ պայմաններով ես տեղափոխվել:
Պայմանագիրս մեկ տարով է կնքված: Եթե հետագայում լավ խաղամ, այլ թիմի մասին կմտածեմ, բայց այս պահին կենտրոնանանալու եմ վրա «Կարմիոտիսսի» եւ իմ առաջ դրված պահանջների վրա:
Առաջին տպավորությունները կա՞ն թիմից:
Լավ թիմ է, որակով ֆուտբոլիստներ կան: Պետք է, որ լավ լինի:
Ի՞նչ գիտեիր մինչ տեղափոխությունդ Կիպրոսի առաջնության մասին:
Ավելի շատ հետեւել էի կիպրոսյան ակումբներին Չեմպիոնների եւ Եվրոպայի լիգայում: Գիտեմ, որ Կիպրոսի առաջնությունը ուժեղ է, երբ «Փյունիկի» հետ գալիս էինք այստեղ հավաքների, զգացվում էր, որ լավ թիմեր կան:
Ի՞նչ են սպասում քեզնից թիմում:
Թիմի նպատակը բարձրագույն խմբում մնալն է: «Կարմիոտիսսը» առաջին անգամ է հայտնվել այստեղ: Ինձնից էլ սպասում են, որ օգնեմ:
Մարզչի հետ շփվե՞լ եք:
Այո, արդեն մեկ անգամ խաղացել եմ ընկերական խաղում:
Ե՞րբ է լինելու նորամուտդ:
Այս շաբաթավերջին ընկերական խաղը կլինի: Օգոտսոսի 22-ին սկսվի առաջնությունը:
Ո՞ր մարզաշապիկն ես վերցրել:
Բոլոր համարները զբաղված էին: Նորմալ համար չկար, կարելի է ասել: Վերցրել եմ 91 համարը:
Այս տարի «Փյունիից» հեռացան նրա հիմնական ֆուտբոլիստները: Ինչո՞ւ թիմը բաց թողեց իր գրեթե բոլոր առաջատարներին:
Նախ եւ առաջ, եթե նրանք մնային իրենց մոտ, միայն անկում էր գրանցվելու: Երկրորդն էլ, «Փյունիկի» երտասարդ ֆուտբոլիստներին հնարավորություն տրվեց իրենց դրսեւորելու:
Վերա Մարտիրոսյան