Վերաքննիչ քրեական դատարանը օգոստոսի 19-ին կհրապարակի «Սասնա ծռեր» խմբի անդամ Պավլիկ Մանուկյանի խափանման միջոց կալանավորումը փոխելու մասին միջնորդության քննության որոշումը:
Լրագրողների հետ զրույցում նրա պաշտպան Ինեսսա Պետրոսյանը նշեց, որ Պավլիկ Մանուկյանին վիրահատելու էին այսօր, սակայն, քանի որ այսօր քննվում էր նրա խափանման միջոց կալանքը փոխելու մասին միջնորդության քննությունը եւ նա անպայման ուզում էր ներկա լինել բողոքի քննությանը, այդ պատճառով նրան կվիրահատեն վաղը:
«Ես որպես պաշտպան ուզում եմ, որ նրան վիրահատեն «Էրեբունիում»: Պավլիկը ցավերի մեջ էր, նրան ցավազրկողներ ներարկեցին, որովհետեւ իրեն վատ էր զգում»,-ասաց նա:
Պավլիկ Մանուկյանը նաեւ դատարանում ելույթ է ունեցել եւ ասել, որ ինքը «Սասնա ծռերի» թուր կեծակին է եւ երբեք պատյան չի մտնելու:
Նշենք, որ Պավլիկ Մանուկյանին մեղադրանք է առաջադրվել Քրեական օրենսգրքի 219-րդ հոդվածի 3-րդ մասով, որը սահմանում է շենքեր, շինություններ, տրանսպորտի, հաղորդակցության կամ կապի միջոցներ զավթելը և 235-րդ հոդվածով` ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը:
Հիշեցնենք, որ Պավլիկ Մանուկյանը եւ նրա որդին ոտքերի հատվածում հրազենային վիրավորում էին ստացել ՊՊԾ գնդում տեղի ունեցած փոխհրաձգության հետեւանքով։
