Ադրբեջանի Բալաքենովի շրջանի ոստիկանությունը հանցավոր աշխարհում «Կույր Էլչին» մականունով հայտնի թմրաբարոնի է կալանավորել՝ 35-ամյա Էլչին Ալվասովին, փոխանցում է ԱՊԱ-ն:
Ոստիկանության աշխատակիցների իրականացրած՝ թմրադիլերների ձերբակալության օպերացիայի ընթացքում խուզարկություն է կատարվել Ղազմա գյուղի բնակիչ Էլչին Ալվասովի տանը եւ տնամերձ հողամասում. նրան երկար ժամանակ հաջողվում էր խուսափել պատասխանատվությունից:
Խուզարկության ընթացքում Ալվասովի տանը հայտնաբերվել եւ առգրավվել է արտասահմանյան արտադրության ատրճանակ՝ երեք փամփուշտով, պոլիէթիլենե տոպրակներում փաթեթավորված 1150 գրամ չորացված մարիխուանա, 4 փամփշտակալ՝ որսորդական հրացանի 12 մմ տրամաչափի փամփուշտներով, գիշերային դիտման սարքեր, խցիկներ, բջջայիններ, «Սիմ» համարներ, երկու նոթբուք եւ այլ իրեր:
Տնամերձի զննմամբ հայտնաբերվել են բանկերի հայտարարությամբ հետախուզվող Lexus, BMW, Mercedes եւ «ԳԱԶ 21015» մակնիշի մեքենաներ, նաեւ տարբեր պետհամարանիշներ: Հայտնաբերված իրերը առգրավվել եւ որպես իրեղեն ապացույցներ կցվել են գործին: Ինքն Ալվասովը ձերբակալվել եւ փոխանցվել է քննչական մարմնին:
Ձերբակալված Ալվասովը տեւական ժամանակ զբաղվել է ապօրինի թմրաշրջանառությամբ: Իր գործունեությամբ նա հայտնի էր նաեւ հարեւան Վրաստանում եւ Ռուսաստանում:
