Ուռուցքաբանության ազգային կենտրոնում անցած տարվա մարտի 12-ին մահացած 61-ամյա Սվետլանա Պետրոսյանի գործով նշանակված կրկնակի հանձնաժողովային դատաբժշկական փորձաքննության եզրակացությունը ստացվել է: Այս մասին NEWS.am-ի թղթակցին ասաց գործով տուժողի իրավահաջորդի ներկայացուցիչ Արայիկ Պապիկյանը:
«Մենք այդ եզրակացության հետ համաձայն չենք, քանի որ հստակ ոչինչ գրված չէ: Այդ պատճառով միջնորդել ենք, որ նոր փորձաքննություն նշանակվի»,- ասաց Արայիկ Պապիկյանը:
Նշենք, որ փորձաքննության եզրակացության համաձայն՝ բժշկական սխալ չի հայտնաբերվել:
Ավելի վաղ հաղորդել էինք, որ 61-ամյա Սվետլանա Պետրոսյանի մոտ 2015թ. հունվարի 12-ին հայտնաբերվել էր կրծքագեղձի քաղցկեղ: Ուռուցքաբանության ազգային կենտրոնում կինը մարտի 2-ին քիմիաթերապիա էր ընդունել: Մահացածի որդին պնդում է, որ մայրն առանց լյարդի պատշաճ հետազոտության է ենթարկվել քիմիաթերապիայի, ինչի հետեւանքով լյարդային անբավարարության պատճառով 10 օր անց՝ մարտի 12-ին անց մահացել է:
Դեպքի առթիվ հարուցվել է քրեական գործ Քրեական օրենսգրքի 130-րդ հոդվածի հատկանիշներով, այն է՝ բժշկական օգնություն եւ սպասարկում իրականացնողների կողմից մասնագիտական պարտականությունները չկատարելուն կամ ոչ պատշաճ կատարելուն: