Արարատի մարզի Քաղցրաշեն գյուղում արդեն մթերում են այս տարվա խաղողի բերքը, սակայն նախորդ տարվա բերքի մթերման գումարն ամբողջությամբ չեն ստացել գործարաններից:
Քաղցրաշենցիներից Սաշիկ Հակոբյանը NEWS.am-ի հետ զրույցում ասաց, որ այս տարի բերքը 50 տոկոսով պակասել է:
«Խաղողի բերքատվությունն է ընկել, մարդկանց մեծ մասը գումար չեն ունեցել պարարտանյութի համար, այգիները անմշակ են մնացել: Բացի այդ էլ՝ մարդկանց մի մասը քանդել է այգիները, հուսախաբ են եղել»,- ասաց քաղցրաշենցին:
Սաշիկ Հակոբյանը նշեց, որ ինքն էլ է պատրաստվում բերքահավաքից հետո քանդել այգիները, քանի որ վստահ է, որ հաջորդ տարի էլ ավելի է սրվելու մթերման խնդիրը:
«Գործարանները այգիներ ունեն, ու դրանց տարածքները հետզհետե մեծանում են: Հաջորդ տարիներին էլ բացարձակ չեն ընդունի բերքը»,- ասաց խաղողագործը:
Նշենք, որ գործարանները դեռ մոտ 70 միլիոնի պարտք ունեն քաղցրաշենցի խաղողագործներին:
Նշենք, որ քաղցրաշենցիները եւ հարակի գյուղերի խաղողագործները պարբերաբար բողոքի ցույցեր են կազմակերպել կառավարության մոտ` պահանջելով իրենց պարտքերը: Խաղողագործները վերջին անգամ բողոքի ցույց արեցին մայիսի 26-ին, նախագահական նստավայրի մոտ:
