«Նոյեմբերի 5-ի» գործով դատավարության առաջին նիստի օրը դատարանի բակում օդամղիչ ատրճանակով ոստիկանների ուղղությամբ կրակելու ու նրանցից մի քանիսին վիրավորելու համար 9 տարվա ազատազրկման դատապարտված Հայկ Կյուրեղյանն աջակցություն է հայտնել «Սասնա ծռեր» խմբի անդամներ Արեգ եւ Սերգեյ Կյուրեղյաններին։ Այս մասին NEWS.am-ի հետ զրույցում ասաց նրա հայրը՝ Արմենակ Կյուրեղյանը։
«Նա էլ է համոզված, որ հայ ժողովուրդն իրավիճակը կփոխի։ Իր աջակցությունն է հայտնել եղբայրներին եւ ասել, որ Սասնա ծռերի կողքին է եւ համարում է, որ նրանք հերոսներ են, որոնք իրենց կյանքը դրեցին զոհասեղանին»,-ասաց նա։
Արմենակ Կյուրեղյանը նշեց, որ Հայկն այժմ ինքնակրթությամբ է զբաղվում. «9 տարվա իր պատիժն է կրում, ծիծաղելի պատիժը, բայց ինքը նույպես լավ է տրամադրված։ Ինքնակրթությամբ է զբաղվում, շատ է կարդում, ժամանակն իզուր չի կորցնում»։
Հիշեցնենք, որ 2015թ. սեպտեմբերի 15-ին «Նոյեմբերի 5-ի» գործով դատավարության առաջին նիստի օրը դատարանի բակում օդամղիչ ատրճանակով ոստիկանների ուղղությամբ կրակելու ու նրանցից մի քանիսին վիրավորելու համար Կենտրոն եւ Նորք-Մարաշ վարչական շրջանների ընդհանուր իրավասության դատարանը 9 տարվա ազատազրկման էր դատապարտել Հայկ Կյուրեղյանին:
Գործով բողոք էր ներկայացվել Վերաքննիչ քրեական դատարան, դատարանը անփոփոխ էր թողել առաջին ատյանի դատարանի վճիռը: