Գյումրիում ավարտվել է Ավետիսյանների սպանության գործով դատական գործընթացը (ֆոտոռեպորտաժ):
Օգոստոսի 23-ին՝ եզրափակիչ դատական նիստի ժամանակ, դատավոր Հարություն Մովսեսյանը հրապարակեց դատավճիռը: Ամբաստանյալ Վալերի Պերմյակովը մեղավոր է ճանաչվել մեղադրական բոլոր կետերով՝ Ավետիսյաների ընտանիքի անդամների սպանություն (104-րդ հոդվածի 2-րդ մասի 5-րդ եւ 8-րդ կետեր), զինված հարձակում (175-րդհոդվածի 2-րդ մասի 3-րդ եւ 4-րդ կետեր), սահմանի ապօրինի հատման փորձ (34-329 հոդվածի 1-ին մաս): Դատարանի վճռի համաձայն՝ Պերմյակովը դատապարտվել է ցմահ ազատազրկման:
Նշենք, որ վերջին նիստում ուժեղացվել էին անվտանգության միջոցառումները, մեծացվել էր նաեւ ոստիկանների թիվը: Դատավճիռը հրապարակվել է սպանվածների հարազատների եւ իրավահաջորդների ներկայացուցիչների բացակայությամբ: Ավելի վաղ տուժած կողմի փաստաբանները հրաժարվել էին մասնակցել գործընթացին՝ հայտնելով, որ դատավորը մերժում է իրենց միջնորդությունները եւ սահմանափակված է իր գործողություններում:
2015-ի դեկտեմբերի 18-ին սկսված դատական գործընթացը, չնայած բազմաթիվ բողոքների, ընթանում էր Գյումրիում տեղակայված ռուսական 102-րդ բազայի կայազորային դատարանի տարածքում: Ամբողջ գործընթացի ժամանակ Վալերի Պերմյակովը հրաժարվում էր ցուցմունք տալ՝ սահմանափակվելով մեղքն ամբողջովին ընդունելով: Առանցքային վկաների մի մասը դատարան այդպես էլ չներկայացավ, դրա փոխարեն հրապարակվել էին քննության ընթացքում նրանց ցուցմունքները: Դատական լսումների ժամանակ պարզվել էր, որ քննչական փորձը կատարվել էր Ավետիսյանների տան մակետի վրա, այլ ոչ թե հենց Ավետիսյանների տանը:
Տուժողի իրավահաջորդի ներկայացուցիչ, իրավապաշտպան Արթուր Սաքունցի կարծիքով քննությունը չի ընթացել պատշաճ մակարդակով, հայտնի չեն հանցագործության դրդապատճառները, հնարավոր հանցակիցները կամ պատվիրատուները: Ռուսաստանից նյութական վնասը հատուցելու համար քաղաքացիական հայց ներկայացնելու մասին տուժող կողմի իրավահաջորդների մյուս փաստաբանների միջնորդությունը մերժվել է:
Ողբերգական դեպքը տեղի էր ունեցել 2015-ի հունվարի 12-ին: Մեղադրական եզրակացության համաձայն՝ 2015-ի հունվարի 12-ին Գյումրիի ռուսական ռազմակայանի զինծառայող Վալերի Պերմյակովը մտել է Ավետիսյանների ընտանիքի տուն ու սպանել տան բնակիչներ Աիդա Ավետիսյանին, Հասմիկ Ավետիսյանին, Սերյոժա Ավետիսյանին, Արմեն Ավետիսյանին, Արաքսյա Պողոսյանին ու փոքրիկ Հասմիկ Ավետիսյանին: Հետո նա դանակով հինգ հարված է հասցրել 6-ամսական Սերյոժա Ավետիսյանին: Յոթ օր անց երեխան մահացել էր հիվանդանոցում:
Վալերի Պերմյակովն իր գործողությունենրը բացատրում է այն հանգամանքով, որ ուզում էր տուն վերադառնալ: Պերմյակովը ինքնակամ լքել է դիրքը՝ տանելով իր հետ ինքնաձիգը: Թափառելով գիշերային Գյումրիով՝ նա ցանկացել է խմել եւ կոտրելով Ավետիսյանների տան մատուհանը՝ մտել է նրանց տուն: Աղմուկից արթնացած Հասմիկ Ավետիսյանը բղավել էր: Պերմյակովի պնդմամբ՝ ինքը վախեցել էր եւ դրա համար սկսել էր կրակել: Ընդ որում, հարեւաններից ոչ մեկը կրակոցի ձայներ չի լսել: Սպանելով ընտանիքի անդամներին՝ Պերմյակովը զգեստափոխվել էր եւ դիմել փախուստի՝ իր հետ տանելով տնից վերցրած մի փոքր գումար եւ սպանվածների բջջային հեռախոսները: Ընդ որում, սեփական համազգեստն իր անունով եւ ազգանունով, ինչպես նաեւ ինքնաձիգը թողել էր Ավետիսյանների տանը: Պերմյակովին գտել էին ռուս սահմանապահները «Բայանդուր» ուղեկալի տարածքում:
2015-ի օգոստոսի 21-ին Գյումրիում կայազորային դատարանը Պերմյակովին դասալքության համար 10 տարվա ազատազրկման էին դատապարտել խիստ ռեժիմով գաղութում:
