ՀՀ վերաքննիչ քրեական դատարանն այսօր՝ օգոստոսի 22-ին, մերժեց «Սասնա ծռերի» կալանավորված անդամ Վարուժան Ավետիսյանի խափանման միջոցը փոխելու վերաբերյալ նրա պաշտպանի միջնորդությունը: Այս մասին լրագրողների հետ զրույցում ասաց նրա պաշտպան Մուշեղ Շուշանյանը՝ նշելով, որ Վարուժան Ավետիսյանը բողոքի քննությանը ներկա չի գտնվել:
«Դատարանի այս որոշմանը որեւէ գնահատական կամ որակում չեմ կարող տալ, քանի որ որոշումը դեռ մեզ չի տրամադրվել, բայց մեկ բան հաստատ է, որ մեր դատարանները քաղաքական որոշումներ են կայացնում, որոնք հրահանգվում են գործադիր կամ այլ մարմինների կողմից»,- ասաց փաստաբանը:
Նշենք, որ պաշտպանը Վերաքննիչին միջնորդել էր գրավի դիմաց ազատ արձակել Վարուժան Ավետիսյանին կամ վերացնել նրա խափանման միջոց կալանքը:
Վարուժան Ավետիսյանին մեղադրանք է ՀՀ Քր.օր.-ի 218 հոդվածի 3-րդ մասի 1-ին կետով (պատանդ վերցնելը) եւ 235 հոդվածի 3-րդ մասով (ապօրինի զենք զինամթերք ձեռք բերել, իրացնել, պահել, փոխադրել): Այս մեղադրանքներին ավելի ուշ միացվել է նաեւ նախորդ տարվա ապրիլի 24-ին զանգվածային անկարգություններ կազմակերպելու՝ նրա դեմ առաջադրված մեղադրանքը: