Ռուսաստանն ամեն դեպքում Հայաստանին դուրս չի թողնի իր ազդեցության գոտուց՝ այս մասին է վկայում պատմությունը: «Ռեգիոն» հետազոտական կենտրոնի կազմակերպած օնլայն մամուլի ասուլիսի ժամանակ այս մասին ասել է Տնտեսագիտության բարձրագույն դպրոցի Ազգային հետազոտական համալսարանի համաշխարհային տնտեսության ու քաղաքականության ֆակուլտետի պրոֆեսոր, ՌԳԱ Համաշխարհային տնտեսության ու միջազգային հարաբերությունների ինստիտուտի առաջատար գիտաշխատող Ալեքսեյ Պորտանսկին՝ պատասխանելով NEWS.am–ի հարցին այն մասին, արդյոք օգոստոսի 8-ին Բաքվում Ռուսաստան- Իրան- Ադրբեջան եռակողմ գագաթնաժողովի ժամանակ ձեռք բերված պայմանավորվածությունների արդյունքում Հայաստանը խաղից դուրս է մնացել:
Այն հարցին, արդյոք Իրանից Հայաստան մայրուղու կառուցման հեռանկարների վրա բացասաբար չի ազդի Կասպից ծովի արեւմտյան ափով «Հյուսիս-Հարավ» տրանսպորտային միջանցքի նախագծի իրական մշակման մեկնարկի մասին Ռուսաստանի, Ադրբեջանի ու Իրանի պայմանավորվածությունը՝ Ալեքսեյ Պորտանսկին նկատել է, որ այդ հարցի լուծումը կախված է Թեհրանի ու Երեւանի մտադրություններից: «Դրա համար էլ մեզ համար այդ հարցում դժվար է որեւէ դատողություն անելը: Կարծում եմ ՝ այդ նախագիծը պետք է պահպանվի»,- հավելել է պրոֆեսորը: