Չինական կողմը հետաքրքրված է հայ-իրանական երկաթգծի կառուցմամբ: Այս մասին օգոստոսի 22-ին, ՀՀ տրանսպորտի եւ կապի նախարար Գագիկ Բեգլարյանի հետ հանդիպման ժամանակ նշել է ՉԺՀ առեւտրի նախարարի տեղակալ Ցյան Կեմինը: Հանդիպմանը մասնակցել է նաեւ ՀՀ-ում ՉԺՀ արտակարգ եւ լիազոր դեսպան Թիան Էրլունը, չինական «CCECC» կազմակերպության եւ «Սինոհիդրո Քորփորեյշն» ՓԲԸ-ի ներկայացուցիչներ:
ՀՀ տրանսպորտի եւ կապի նախարարությունից NEWS.am-ին հայտնում են, որ նախարար Գագիկ Բեգլարյանը ողջունելով Ցյան Կեմինին՝ ընդգծեց, որ տրանսպորտի եւ կապի ոլորտում հայ-չինական հարաբերություններն օրեցօր ավելի են զարգանում:
«Մի քանի տարի շարունակ չինական մի շարք կազմակերպություններ Հայաստանի Հանրապետության ճանապարհաշինության ոլորտում փորձում էին իրականացնել տարբեր ծրագրեր եւ, վերջապես, այս տարի դա հաջողվեց: Մենք այսօր աշխատում ենք «Սինոհիդրո Քորփորեյշն» ընկերության հետ, իսկ ավելի երկար տարիներ համագործակցել ենք նաեւ «CCECC» կազմակերպության հետ», - ասաց Գ. Բեգլարյանը:
ՉԺՀ առեւտրի նախարարի տեղակալ Ց. Կեմինը նույնպես կարեւորեց վերջին շրջանում երկու երկրների համագործակցության ձեռքբերումները հատկապես տրանսպորտային ենթակառուցվածքների ոլորտում։
«Համագործակցության լավագույն հնարավորություն է այն, որ չինական «Սինոհիդրո Քորփորեյշն» կազմակերպությունը տենդեր է շահել «Հյուսիս-հարավ» ճանապարհային միջանցքի կառուցման նախագծում: Չինական կողմը ժամանակին եւ որակյալ կիրականացնի այդ աշխատանքը, եւ մենք ակնկալում ենք հայկական կողմի համակողմանի աջակցությունը», - նշեց Ց. Կեմինը:
Կողմերն անդրադարձան նաեւ Մետաքսի ճանապարհի վերականգնման կարեւորությանը եւ այն դերին, որ որպես տրանսպորտային հանգույց ունի Հայաստանի Հանրապետությունը Եվրասիական տարածաշրջանում։ Չինական կողմը նաեւ նշեց, որ հետաքրքրված են հայ-իրանական երկաթգծի կառուցմամբ:
Հանդիպման ավարտին ՉԺՀ առեւտրի նախարարի տեղակալը պատրաստակամություն հայտնեց հետագայում եւս շարունակել համագործակցությունը ճանապարհաշինության ոլորտում: ՀՀ տրանսպորտի եւ կապի նախարարը վստահեցրեց, որ հայկական կողմը եւս շահագրգիռ է երկու երկրների միջեւ տրանսպորտային ենթակառուցվածքների ոլորտում փոխշահավետ, արդյունավետ եւ երկարատեւ համագործակցությամբ:
