«Սասնա ծռեր» խմբի անդամների աջակիցներն այսօր՝ օգոստոսի 23-ին, ՀՀ Մարդու իրավունքների պաշտպանի գրասենյակում հանդիպեցին օմբուդսմեն Արման Թաթոյանի հետ եւ նրան ներկայացրին «Սասնա ծռերի» վիրավորված անդամներին բուժօգնություն տրամադրելու խնդիրը։ Նրանք մտահոգություն հայտնեցին խմբի անդամներին ծայրահեղ ծանր վիճակում քաղաքացիական հիվանդանոցից «Դատապարտյալների հիվանդանոց» տեղափոխելու կապակցությամբ՝ ակնկալելով Մարդու իրավուքների պաշտպանի աջակցությունն այս խնդրի լուծման հարցում:
«Սասնա ծռեր» խմբի անդամ Հովհաննես Հարությունյանի մայրն էլ նշեց, որ իր որդին Ռուսաստանի Դաշնությունից վերադարձել էր ապրիլյան քառօրյա պատերազմին մասնակցելու համար. «Իմ որդին, երբ իմացավ, որ ադրբեջանցիները եզդի տղայի վիզը կտրել են, ասաց՝ մամա ջան, ես պետք է գնամ, նրանց օգնեմ: Դեռ քանի մայր պետք է իր որդու համար լացի: Հետո եկել էր, թույլ չտվեցին, որ գնա սահման: Հետո հանդիպել էր «Սասնա ծռերի» անդամներին, խոսել նրանց հետ, հասկացել, որ ինչ-որ բանով կարող է օգնել հայրենիքին: Իմ որդին հիմա ինչով է մեղավոր, որ այսպիսի երկրում ենք ապրում, ինչ հանցանք է գործել, ես միայն հպարտանում եմ նրանով»,-ասաց նա:
Արման Թաթոյանը նշեց, որ ՄԻՊ-ը մշտապես ուշադրության կենտրոնում է պահում «Դատապարտյալների հիվանդանոցում» գտնվող «Սասնա ծռեր» խմբի անդամների պահման պայմաններն ու աողջական վիճակը:
«Ինձ համար կարեւոր են անձի պահման պայմանները: Անընդհատ այցելություններ են տեղի ունենում, որոնք ինքնանպատակ չեն: Երեկ էլ են մեր աշխատակիցները եղել «Դատապարտյալների հիվանդանոցում», անդամները նշել են, որ շուրջօրյա խնամքը դադարեցվել է, որին անմիջապես արձագանքել ենք: Անմիջապես քննարկման ընթացակարգ է սկսվել: Ինչ վերաբերում է նրանց քրեակատարողական հիմնարկում գտնվելուն, գոյություն ունի դատական ակտ, մենք չենք կարող դրա վերաբերյալ որեւէ միջամտություն ունենալ: «Դատապարտյալների հիվանդանոցից» նրանք քաղաքացիական հիվանդանոց տեղափոխելու վերաբերյալ նույնպես գրություններ ենք ուղարկել»,-ասաց նա:
Թաթոյանը նաեւ նշեց, որ ՄԻՊ ներկայացուցիչներն ու բժիշկը այսօր նույնպես այցելելու են «Դատապարտյալների հիվանդանոց»՝ համապատասխն ստուգումներ իրականացնելու համար:
Նշենք, որ «Սասնա ծռեր» խմբի անդամների աջակիցները երթով կշարժվեն Արդարադատության նախարարություն, այնուհետև՝ Դատապարտյալների հիվանդանոց։
