«Սասնա ծռեր» խմբի աջակիցները ՄԻՊ գրասենյակից մոտից երթով շարժվելով հասան «Դատապարտյալների հիվանդանոցի» մոտ: NEWS.am-ի թղթակիցն հաղորդում է, որ դեպի «Դատապարտյալների հիվանդանոցի» շենք տանող ճանապարհին ոստիկանական պատնեշ է եւ երթի մասնակիցներին թույլ չեն տալիս մոտենալ «Դատապարտյալների հիվանդանոցի» շենքին: Երթի մասնակիցների մեջ են նաեւ «Սասնա ծռերի» անդամ Հովհաննես Հարությունյանի փաստաբաններ Արա Ղարագյոզյանը եւ Հայարփի Սարգսյանը, որոնց նույնպես թույլ չեն տալիս անցնել ոստիկանական պատնեշից այն կողմ:
Նշենք, որ «Սասնա ծռեր» խմբի աջակիցները մի քանի րոպե կանգնեցին Արդարադատության նախարարության շենքի դիմաց, նրանք պահանջում էին հանդիպում Արդարատության նախարար Արփինե Հովհաննիսյանի հետ, սակայն, հանդիպում այդպես էլ տեղի չունեցավ:
Երթի մասնակիցները պահանջում են, որ «Դատապարտյալների հիվանդանոցում» գտնվող «Սասնա ծռերի» վիրավոր անդամներին պատշաճ բուժօգնություն տրամադրվի: Մասնավորապես, «Սասնա ծռերից» Հովհաննես Հարությունյանի պաշտպան Հայարփի Սարգսյանը նշել է, որ իր պաշտպանյալը արդեն մի քանի օր է՝ չի կարողանում շարժել ոտքը, սակայն նրան պատշաճ բուժօգնություն չի ցուցաբերվում:
Հիշեցնենք, որ «Սասնա ծռերից» Պավլիկ եւ Արամ Մանուկյանների փաստաբան Ինեսա Պետրոսյանը նախօրեին հայտարարել էր, որ «Դատապարտյալների հիվանդանոցում» հանվել է «Էրեբունի» ԲԿ-ի բուժակի կողմից շուրջօրյա հերթապահությունը, ինչը նրանց իրավունքների խախտում է: