«Ընդդեմ իրավական կամայականությունների» ՀԿ նախագահ Լարիսա Աավերդանը դիմել է «Կարմիր խաչի» միջազգային կոմիտե՝խնդրելով իր հանդիպումը կազմակերպել «Դատապարտյալների հիվանդանոցում» գտնվող «Սասնա ծռերի» անդամների հետ: Այս մասին այսօր՝ օգոստոսի 23-ին, լրագրողների հետ զրույցում ասաց նա:
Նա նշեց, որ «Սասնա ծռերի» անդամ Հովհաննես Հարությունյանի եւ մյուս անդամների առողջական վիճակի մասին տեղյակ է եւ պահանջում է, որ օր առաջ նրանց պատշաճ բուժօգնություն ցուցաբերեն:
ԱԺ պատգամավոր Զարուհի Փոստանջյանն էլ նշեց, որ հանդիպել է «Դատապարտյալների հիվանդանոցի» պետի հետ, որը տեղեկացրել է, որ օգոստոսի 24-ին Երեւանի «Էրեբունի» հիվանդանոցի բժիշկները կայցելեն «Սասնա ծռերի» անդամներին եւ անհրաժեշտ հետազոտություն կանցկացնեն եւ բուժօգնություն կտրամադրեն նրանց:
Նշենք, որ ի աջակցություն «Սասնա ծռերի» այսօր Երեւանում երթ է կազմակերպվել: Երթի մասնակիցները պահանջում են, որ «Դատապարտյալների հիվանդանոցում» գտնվող «Սասնա ծռերի» վիրավոր անդամներին պատշաճ բուժօգնություն տրամադրվի: Մասնավորապես, «Սասնա ծռերից» Հովհաննես Հարությունյանի պաշտպան Հայարփի Սարգսյանը նշել է, որ իր պաշտպանյալը արդեն մի քանի օր է՝ չի կարողանում շարժել ոտքը, սակայն նրան պատշաճ բուժօգնություն չի ցուցաբերվում:
Հիշեցնենք, որ «Սասնա ծռերից» Պավլիկ եւ Արամ Մանուկյանների փաստաբան Ինեսա Պետրոսյանը նախօրեին հայտարարել էր, որ «Դատապարտյալների հիվանդանոցում» հանվել է «Էրեբունի» ԲԿ-ի բուժակի կողմից շուրջօրյա հերթապահությունը, ինչը նրանց իրավունքների խախտում է: