«Սասնա ծռեր» խմբի անդամ Հովհաննես Հարությունյանի փաստաբաններ Արա Ղարագյոզյանը եւ Հայարփի Սարգսյանը դիմելու են «Խոշտանգումների կանխարգելման կոմիտե»՝ նրան շտապ վիրահատության ենթարկելու հարցով: Այս մասին այսօր՝ օգոստոսի 23-ին, լրագրողների հետ զրույցում ասաց նրա պաշտպան Արա Ղարագյոզյանը:
«Պատշաճ չի Հովհաննես Հարությունյանին ցուցաբերված բժշկական օգնությունը: Խոշտանգումների կանխարգելման կոմիտե ենք դիմելու, որպեսզի շտապ վիրահատեն նրան: Հովհաննեսին միայն «Դատապարտյալների հիվանդանոցի» բժիշկներն են տեսակցել, նա ոտքի շրջանում ցավեր ունի: Պետք է գտնվի քաղաքացիական հիվանդանոցում՝ Երեւանի «Էրեբունի» բժշկական կենտրոնում եւ վիրահատվի ու բուժօգնություն ստանա այնտեղ»,-ասաց փաստաբանը:
Նշենք, որ Հովհաննես Հարությունյանը վիրավորվել էր հուլիսի 26-ին եւ տեղափոխվել հիվանդանոց: Հովհաննեսին մեղադրանք է առաջադրվել ՀՀ քրեական օրենսգրքի 219-րդ հոդվածի 3-րդ մասի 1-ին կետի եւ 235-րդ հոդվածի 3-րդ մասի հատկանիշներով, ինչպես նաեւ նրա նկատմամբ որպես խափանման միջոց է ընտրվել կալանավորումը: