Ադրբեջանում մտադրվել են կրճատել Նախիջեւանի իշխանությունների լիազորությունները:
«Ադրբեջանում փոխնախագահի ինստիտուտի ստեղծումը հատուկ ուշադրություն է գրավում: Այդ ինստիտուտի ներդրումը Ադրբեջանի կառավարման համակարգը կատարելագործում է եւ պարզեցնում»,- «Ենի Մուսավաթ»-ի հետ հարցազրույցում ի պատասխան փոխնախագահի պաշտոնի համար թեկնածուների հարցին՝ ասել է իշխող վերնախավի ամենատեղեկացված ներկայացուցիչներից մեկը՝ Միլի մեջլիսի պատգամավոր Ֆազաիլ Աղամալին:
«Փոխնախագահների ընտրության հարցում իմ ուշադրությունը մի կարեւոր պահ գրավեց: Արդեն շատ տարիներ Նախիջեւանի Ինքնավար Հանրապետությունում ղեկավարում է Գերագույն խորհրդի նախագահ Վասիֆ Թալիբովը: Սահմանադրության համաձայն՝ եւ՛ Միլի մեջլիսը, եւ՛ Նախիջեւանի Գերագույն խորհուրդը իշխանության երկրորդ ճյուղն են համարվում եւ ուղղակիորեն չեն ենթարկվում նախագահին: Այդ խնդիրը վերացնելու համար, հնարավոր է, Նախիջեւանի ղեկավարը պետք է դառնա Ադրբեջանի փոխնախագահ»,- հայտարարել է Ֆազաիլ Աղամալին:
Հիշեցնենք, որ Ադրբեջանում սահմանադրական բարեփոխումների հանրաքվեն տեղի կունենա սեպտեմբերի 26-ին:
