Սարի թաղում հուլիսի 29-ին զանգվածային անկարգություններ կազմակերպելու մեջ մեղադրվող, «Նոր Հայաստանի» անդամ Անդրիաս Ղուկասյանի կալանքի վերաբերյալ վերաքննիչ բողոքը քննող դատավոր Գրիշա Մելիք Սարգսյանը նրանից հետաքրքրվել է՝ արդյոք շարունակելու է իր ընդդիմադիր գործունեությունը, եթե ազատ արձակվի: Այս մասին լրագրողների հետ զրույցում բողոքի քննության ավարտից հետո ասաց պաշտպան Լուսինե Սահակյանը, որի միջնորդությունը դատարանը մերժել էր:
Փաստաբանը նշեց, որ Անդրիաս Ղուկասյանը հայտարարել է, որ շարունակելու է պայքարը, իր գործունեությունում ոչինչ չի փոխվելու:
«Ակնհայտ է, որ սա էական նշանակություն ունեցավ, դատարանը չհասկացավ, որ գոնե քողարկված որոշում պետք է կայացնի ու ցույց չտա, որ քաղաքական հետապնդում է իրականացվում Անդրիաս Ղուկասյանի նկատմամբ: Այդ փաստը դատարանը հիմնավորեց իր գործողություններով»,- ասաց պաշտպանը:
Ըստ փաստաբանի՝ Անդրիաս Ղուկասյանի նկատմամբ կա հատուկ վերաբերմունք, նրանից հատուկ վրեժ է լուծվում:
Արդեն 24-րդ օրը հացադուլի մեջ գտնվող Անդրիաս Ղուկասյանը, փաստաբանի խոսքով, դատարանում ասել է նաեւ, որ շարունակելու է հացադուլը ու փաստաբանի միջոցով հայտարարություն տարածել:
«Հուլիսի 30-ի հանրահավաքն ունեցավ մեծ քաղաքական նշանակություն: Վարչախումբը պարտվեց, ժողովուրդը չկարողացավ ամրագրել իր պայքարը, զգացվեց երիտասարդության նախաձեռնողականության պակասը: Հանրությունը հասկանում է արմատական փոփոխությունների անհրաժեշտությունը: Եկել է ժամանակը համախմբվելու հանուն մեր երկրի արժանապատիվ ապագայի»,- ասված է հայտարարության մեջ:
Հիշեցնենք, որ դատարանն այսօր՝ օգոստոսի 24-ին մերժել էր փաստաբանի երկու բողոքները՝ ձերբակալության եւ կալանավորման դեմ:
Նշենք, որ նույն մեղադրանքով, նույն հիմքերով կալանավորված քաղաքական գործիչներ Դավիթ Սանասարյանը եւ Արմեն Մարտիրոսյանը ազատ էին արձակվել վերաքննիչ դատարանի որոշմամբ: Փաստաբանը կարծում էր՝ Անդրիաս Ղուկասյանը նույնպես պետք է ազատ արձակվեր:
«Նոր Հայաստանի» անդամ Անդրիաս Ղուկասյանը ձերբակալվել է հուլիսի 29-ին, նրան մեղադրանք է առաջադրվել Քրեական օրենսգրքի 225-րդ հոդվածի 1-ին մասով՝ զանգվածային անկարգություններ: Նա կալանավորված է:
