«Սասնա ծռեր» խմբավորման անդամ Հովհաննես Հարությունյանի ոտքի երկաթը հանել են, որ իրեն շատ ցավ էր պատճառում, արդեն ի վիճակի է ոտքը շարժել, ողնաշարը շարժել, որպեսզի արյան շրջանառությունը նորմալանա, ցավերը մի քիչ մեղմանան: Այս մասին այսօր՝ օգոստոսի 24-ին, «Դատապարտյալների» հիվանդանոցի մոտ, լրագրողների հետ զրույցում նշել է «Սասնա ծռերից» Հարություն Հովհաննիսյանի մայրը՝ Լաուրա Հարությունյանը:
Նրա խոսքով, իր ծանոթ բժշկին, ում միջնորդել էր որդուն վիրահատելու համար թույլ չեն տվել մտնել «Դատապարտյալների հիվանդանոց». «Իմ կողմից հրավիրված բժշկի մուտքը արգելվել է: «Էրեբունի» ԲԿ-ի բժիշկները ներսում են, սպասում ենք պատասխանի, եթե իրենք կվիրահատեն, ուրեմն իրենք կվիրահատեն»:
Հարցին, թե նա չի՞ վստահում բժիշկներին, Լաուրա Հարությունյանը պատասխանեց, որ վստահում է. «Ես բոլոր բժիշկներին էլ վստահում եմ, ուղղակի ինձ պետք է անհապաղ վիրահատություն: Բժիշկը մեր երկրորդ աստվածն է: Վստահում եմ բոլոր բժիշկներին, իմ միակ ցանկությունն է, որ արագ վիրահատվի»:
Ավելի վաղ «Էրեբունի» ԲԿ-ի տնօրեն Միքայել Մանուկյանը հայտնել էր, որ հաջորդ շաբաթվանից «Սասնա ծռերի» վիրավոր անդամների վիրահատություններ են իրականացնելու: Այսօր բժիշկները եկել էին զննելու հիվանդներին: