Մյանմայում տեղի է ունեցել 6,8 մագնիտուդի երկրաշարժ: Ստորգետնյա ցնցումները զգացվել են նաեւ Թայլանդում, Բանգլադեշում եւ Հնդկաստանում:
Երկրաշարժի էպիկենտրոնը գտնվում է Չաու քաղաքից 25 կմ հեռավորությամբ, երկրաշարժի օջախը տեղակայված է 84 կմ խորության վրա, հայտնել է ԱՄՆ Երկրաբանական ծառայությունը: Տուժողների մասին պաշտոնական տեղեկություններ առայժմ չկան:
«ՖրանսՊրես» գործակալությունը, սակայն, հայտնել է, որ երկրաշարժին զոհ է գնացել մի 22-ամյա երտասարդ՝ շենքի փլուզման հետեւանքով: Տուժել է եւս մի կին:
Երկրաշարժը վնասել է նաեւ հին Պեգան քաղաքը: Հաղորդվում է, որ վնասվել են քաղաքի հնագույն սրբավայրերը:
Մյանմայի խոշորագույն քաղաքներից Յանգոնում ստորգետնյա ցնցումներից շենքեր են սասանվել: Բանգլադեշի մայրաքաղաք Դաքայում առնվազն 20 մարդ է վիրավորվել: Հնդկաստանի Կալկաթա քաղաքում կանգնեցվել է մետրոյի աշխատանքը:
