Հայաստանի իշխանությունները այլ ելք չեն տեսնում, քան քաղաքական հակառակորդներին բերդերում մեկուսացնելը: Այսօր այս մասին հայտարարել է «Ժառանգություն» կուսակցության անդամ Հովսեփ Խուրշուդյանը «Վարդաշեն» քրեակատարողական հիմնարկից ազատ արձակվելուց հետո:
«Ինձ ուղղված մեղադրանքը անհեթեթ էր, երկու ոստիկանի կեղծ ցուցմունքով զրպարտություն էր, երկուսն էլ նույնաբովանդակ ցուցմունք են տվել, սարքել են` կոպիտ ասած: Լավ է, որ ազատ արձակեցին ինձ գրավի դիմաց, բայց դրանից իրենց պատասխանատվությունը չի նվազում բանտերը լցված քաղբանտարկյալների նկատմամբ»,-ասել է Հովսեփ Խուրշուդյանը:
Նա հայտարարել է, որ մեկամսյա կալանքը ոչինչ չի փոխել իր կյանքում, նա շարունակելու է պայքարը։ «Այսուհետ պայքարը պետք է գնա երկու ուղղությամբ` նախ եւ առաջ քաղբանտարկյալներին ազատ արձակելու, ապա քաղաքական օրակարգում եղած պահանջով` իշխանություններից ազատվելու ուղղությամբ: Ինքան շուտ ազատվենք այս հանցագործներից, այնքան լավ»,- ասել է Խուրշուդյանը:
Ըստ ժառանգության անդամի` իշխանությունները թիրախավորել են նրանց, որոնց քաղաքական գործունեությունից վտանգ են տեսնում. «Այլ ելք չեն գտնում, քան քաղաքական հակառակորդներին բերդերում մեկուսացնելը»:
Հովսեփ Խուրշուդյանը հայտարարել է, որ ինքը եւս այս մեկ ամսում անազղատության մեջ է եղել որպես քաղբանտարկյալ:
Նշենք, որ նրան բանտարկելով` իշխանությունները տապալել են միջազգային նշանակության մի միջոցառում, որը կազմակերպել էր Հովսեփ Խուրշուդյանը: Նա ասել է, որ այդ կապակցությամբ դեռ զարգացումներ են լինելու, իշխանություններին «անակնկալ» է սպասվում:
«Միջազգային խոշոր կոնֆերանս է լինելու Բրատիսլավայում` նվիրված Սլովակիայի Եվրամիությունում նախագահությանը, երիտասարդական, մարդու իրավունքների հարցերի վերաբերյա, որին մասնակցում են 150 ներկայացուցիչ տարբեր երկրներից`եվրոպական երկրներից, Ռուսաստանից , Եվրահանձնաժողովից»:
Հովսեփ Խուրշուդյանը բողոքարկելու է կալանավորման որոշումը:
Հիշեցնենք, որ այսօր Արաբկիր և Քանաքեռ-Զեյթուն վարչական շրջանների ընդհանուր իրավասության դատարանի որոշմամբ «Ժառանգության» անդամ Հովսեփ Խուրշուդյանը 1 միլիոն դրամ գրավի դիմաց ազատ է արձակվել:
Նա կալանավորվել էր հուլիսի 30-31-ին զանգվածային անկարգություններ կազմակերպելու մեղադրանքով: