Մոսկվայի կենտրոնում «Սիթիբանկ»-ի մասնաճյուղը գրաված եւ մարդկանց պատանդառած, հետո ձերբակալված գործարար Արամ Պետրոսյանը կարող է խուսափել պատժից, քանի որ ինքնակամ ազատ է արձակել պատանդներին եւ հանձնվել: Այս մասին հաղորդում է ՌԻԱ Նովոստին՝ վկայակոչելով իրավապահ մարմիններում սեփական աղբյուրին:
«Մարդկանց պատանդառելու համար ձերբակալվածին ոչինչ չի սպառնում: Քրեական օրենսգրքում հատուկ նշում կա, որ անձը, որը կամավոր կամ իշխանությունների պահանջով ազատ է արձակել պատանդներին, ազատվում է քրեական պատասխանատվությունից»,- նշել է գործակալության աղբյուրը:
Նա, միաժամանակ, նշել է, որ օրենքով պատիժ է նախատեսվում միայն այն դեպքում, եթե պատանդառմանը զուգահեռ այլ հանցագործություններ են իրականացվել. զենքի ապօրինի շրջանառություն, մարմնական վնասվածքներ հասնել եւ այլն:
«Այս դեպքում նրա մոտ զենք չի եղել, նա ոչ ոքի չի ծեծել, ակնհայտ որեւէ այլ հանցագործություն չի կատարել, որոնց մասին այս պահին հայտնի է: Եթե հետաքննությունը այլ հոդվածով քրեական գործ հարուցելու պատճառ գտնի, ապա նա որպես ահաբեկիչ լիարժեք պատիժ կստանա: Բայց առայժմ գործ է հարուցվել միայն 206 հոդվածով, որով պահանջվում է նրան ազատ արձակել առանց պատժի՝ ինքնակամ հանցագործությունից հրաժարվելու համար»,- պարզաբանել է գործակալության զրուցակիցը:
Նա նաեւ նշել է, որ հարցեր է առաջացնում ձերբակալվածի հոգեկան առողջությունը, ինչի հետ կապված հետաքննությունը կարող է հոգեբուժական փորձաքննություն պահանջել եւ նրան հարկադիր բուժման ուղարկել:
