Բրազիլիայում, այսօր՝ օգոստոսի 25-ին, սկսվում է երկրի նախագահ Դիլմա Ռուսեֆի պաշտոնանկության երկարատեւ գործընթացի վերջին փուլը:
Այս փուլը կտեւի մի քանի օր, որը կսկսվի Սենատի արտակարգ նստաշրջանով՝ գերագույն դատարանի ղեկավար Ռիկարդու Լեւանդովսկիի նախագահությամբ: Հաջորդ օրը, օգոստոսի 26-ին, տեղի կունենա վկաների հարցաքննությունը:
Նախապես ենթադրվում էր, որ այդ գործընթացը կտեւի ողջ օրը, սակայն չի բացառվում, որ այն շարունակվի նաեւ շաբաթ:
Հիմնական իրադարձությունները սպասվում են օգոստոսի 29-ին: Հենց այդ օրը Ռուսեֆին ինքնապաշտպանական խոսք կտրամադրվի: Telesur ալիքի փոխանցմամբ, նրան կտրամադրվի կես ժամ, սակայն Լեւանդովսկին արդեն հայտարարել է, որ անհրաժեշտության դեպքում այդ ժամանակահատվածը կարող է երկարաձգվել:
Այդ ընթացքում երկրի նախագահին մեղադրողներն ու պաշտպանները նրան հարցեր կուղղեն, իսկ հետո սենատորները երկարատեւ բանավեճ կսկսեն եւ ելույթներ կունենան, որը կարող է տեւել մինչեւ 20 ժամ:
Միայն այդ բոլոր փուլերից հետո սենատորները կանցնեն քվեարկության, սակայն ըստ Լեւանդովսկիի, այդ ընթացակարգի հստակ ժամկետը դեռ հայտնի չէ: Փորձագետները նշում են, որ դա կարող է տեղի ունենալ օգոստոսի 30-ին կամ 31-ին: