Ոստիկանի նկատմամբ բռնություն գործադրելու մեջ մեղադրվող` «Հիմնադիր խորհրդարանի» անդամ Գեւորգ Սաֆարյանը վատառողջ է: Այս մասին այսօր՝ օգոստոսի 25-ին, լրագրողների հետ զրույցում ասաց նրա պաշտպան Տիգրան Հայրապետյանը:

«Ոտքը ցավում է, դժվարությամբ է քայլում: 8 օր առաջ, երբ հանդիպել եմ, ավելի դժվար էր քայլում, ասացին՝ կարող է թարախակալել է, բայց դեռ հստակ չգիտենք պատճառը»,- ասաց փաստաբանը՝ կարծիք հայտնելով, որ քիչ տեղաշարժվելու հետեւանքով է նման խնդիր առաջացել Գեւորգի մոտ:

Փաստաբանը նշեց, որ ՔԿՀ-ն չունի համապատասխան մասնագետներ, որ ճիշտ աշխտորոշում տան: Նա դիմել ՔԿՀ-ի ղեկավարին, Մարդու իրավունքների պաշտպանին, որ շտապ միջոցներ ձեռնարկեն, Գեւորգ Սաֆարյանին տեղափոխեն հիվանդանոց ախտորոշման եւ բուժման համար,  սակայն դեռ դրական արձագանք չի ստացել:

Գեւորգ Սաֆարյանին մեղադրանք է առաջադրվել Քրեական օրենսգրքի 316-րդ հոդվածի 1-ին մասով:

Հիշեցնենք, որ Երեւանի Ազատության հրապարակում 2016թ. հունվարի 1-ին ընդդիմադիր «Նոր Հայաստանի» անդամների եւ ոստիկանների միջեւ բախումներ էին տեղի ունեցել: Պատճառը տոնածառի հագուստով մայրաքաղաքի փողոցներում շրջող ակտիվիստն էր: Երեք անձ բերման էր ենթարկել, այդ թվում՝ Գեւորգ Սաֆարյանը, որին հետագայում էլ կալանավորեցին:

Ըստ իրավապահ մարմինների` Գեւորգ Սաֆարյանը բռնություն է գործադրել Ոստիկանության 4-րդ հատուկ գումարտակի հրամանատար, ոստիկանության կապիտան Գեղամ Խաչատրյանի նկատմամբ: