«Սասնա ծռերին» օժանդակելու մեղադրանքով կալանավորված «Հիմնադիր խորհրդարանի» անդամ Կարո Եղնուկյանի ընկերներն ու հարազատներն այսօր՝ օգոստոսի 25-ին, ՀՀ գլխավոր դատախազության շենքի առջեւ բողոքի ակցիա են իրականացնում՝ ի պաշտպանություն նրա:
«Մենք պահանջում ենք ազատ արձակել Կարո Եղնուկյանին եւ մյուս քաղբանտարկյալներին։ Մենք, իհարկե, հույսեր չենք կապում այս կառույցի հետ, որ իրավական որոշում կկայացնի։ Մեր աջակցությունն ենք հայտնում Կարող Եղնուկյանին եւ մյուսներին։ Նաեւ այսկերպ պետք է մեծացնենք ճնշումը այդ կառույցների վրա, որ կատարեն օրենքի պահանջները։ Քանի մենք թույլ ենք, կատարում են Սերժ Սարգսյանի պահանջները։ Իրավիճակի փոփոխությունը մեզնից է կախված»,- NEWS.am-ի հետ զրույցում ասաց Դավիթ Սանասարյանը։
Ակցիայի մասնակիցները իրենց հետ բերել են Եղնուկյանի նկարով պաստառներ եւ Հայաստանի դրոշներ։ Նրանք վանկարկում են «Ազատություն Կարո Եղնուկյանին», «Ազատություն քաղբանտարկյալներին»։ Դատախազության մոտ են նաեւ Պարույր Հայրիկյանն ու Ալեք Ենիգոմշյանը։
Կարո Եղնուկյանին մեղադրանք է առաջադրվել Քրեական օրենսգրքի 38-218-րդ եւ 38-219-րդ հոդվածներով՝ պատանդ վերցնելուն, շենքեր, շինություններ, տրանսպորտի, հաղորդակցության կամ կապի միջոցներ զավթելուն աջակցելու համար:
Նշենք, որ Կարո Եղնուկյանը ձերբակալվել է հուլիսի 19-ին: Ազգային անվտանգության ծառայությունը խուզարկություն էր իրականացրել Կարո Եղնուկյանի եւ նրա կնոջ մոր բնակարաններում, երկու մեքենաներում, ավտոտնակում, որից հետո Եղնուկյանը բերման էր ենթարկվել եւ ձերբակալվել: