Քաղբանտարկյալները պետք է քաղաքական պայքարի արդյունքում ազատ արձակվեն, ոչ թե համաներում հայտարարելու շնորհիվ: Այս մասին այսօր՝ օգոստոսի 26-ին, լրագրողների հետ հանդիպմանն ասաց «Ժառանգություն» կուսակցության անդամ Հովսեփ Խուրշուդյանը:
«Իհարկե ողջունելի է համաներումը, թեեւ հասկանալի է, թե Հայաստանի իշխանությունները ինչ նպատակով կանեն դա՝ ընտրություններ են առաջիկայում»,- հավելեց Հովսեփ Խուրշուդյանը:
Նույն կուսակցության մամուլի խոսնակ Դավիթ Սանասարյանի խոսքով՝ համաներումը արդարացում չի, «Սասնա ծռերի», նրանց աջակցելու եւ Սերի թաղում տեղի ունեցած դեպքերով հարուցված քրգործերը պետք է կարճվեն հանցակազմի բացակայության հիմքով:
«Մենք չենք սպասում Սերժ Սարգսյանի շնորհներին: Մենք ասում ենք՝ այս մարդիկ իրենց քաղաքական հայացքների համար են հայտնվել բանտերում, մեկ օր շուտ պետք է դուրս գան, ոչ թե սպասենք, որ Սերժ Սարգսյանը կամ իշխանություններ մեծահոգություն դրսեւորեն»,- ասաց Դավիթ Սանասարյանը:
Նշենք, որ սեպտեմբերի 21-ին լրանում է Հայաստանի Հանրապետության անկախության 25-ամյակը: Քաղաքական եւ հասարակական շրջանակներում քննարկվում է այս առթիվ հնարավոր համաներման հարցը: