Վերաքննիչ քրեական դատարանը այսօր՝ օգոստոսի 26–ին, մերժել է «Սասնա ծռեր» խմբին սնունդ տարած Արթուր Սարգսյանին ազատ արձակելու փաստաբանի միջնորդությունը։
Հիշեցնենք, որ պաշտպան Տիգրան Եգորյանը միջնորդություն էր ներկայացրել նրան ազատ արձակելու վերաբերյալ։
«Արթուր Սարգսյանի մեղադրանքը փոխվել է: Նա կալանավորել էր նախորդ մեղադրանքով նախատեսված արարքին առնչություն ունենալու վերաբերյալ հիմնավոր կասկածը հաստատվելու արդյունքում, նոր մեղադրանքով ներկայացված արարքներին Արթուր Սարգսյանի առնչություն ունենալու վերաբերյալ հիմնավոր կասկածը չի գնահատվել: Այսինքն դատարանն ընդամենը պետք է ներկայացված թղթերը կարդա, հասկանա սա ու վերացնի այն դատական ակտը, որի հիմքերը վերացել են»,- ասաց փաստաբանը:
Հիշեցնենք, որ սկզբում Արթուր Սարգսյանը մեղադրվում էր զինված խմբի կազմում նախնական համաձայնության շրջանակներում հուլիսի 17-ին ՊՊԾ գնդի տարածք մտնելու մեջ: Հետագայում նրա մեղադրանքը փոխվեց: Նա այժմ մեղադրվում է «Սասնա ծռերին» օժանդակելու մեջ: