Երեւանի նախկին ոստիկանապետ Աշոտ Կարապետյանը NEWS.am-ի հետ զրույցում վստահեցրել է, թե իրեն չի հետաքրքրում՝ իրեն պատժելու ուղղությամբ ինչ քայլեր են նախաձեռնում մի շարք կազմակերպություններ։
Նշենք, որ «Ֆեյսբուք» սոցիալական ցանցում օգոստոսի սկզբին ստեղծվել է «Սասնա ծռեր–բացահայտում» փաստահավաք խումբ, որը հավաքում է նյութեր այն իրավապահների եւ անձանց վերաբերյալ, որոնք բացահայտ ահաբեկչություն են իրականացրել ՀՀ քաղաքացիների նկատմամբ: Այդ բոլոր ցուցակները եւ նյութերը կներկայացվեն ԱՄՆ պետքարտուղարություն՝ Միջազգային քրեական դատարան դիմելու միջնորդություն ներկայացնելու համար և ԱՄՆ կողմից այդ անձանց նկատմամբ անհատական պատժամիջոցներ սահմանելու համար:
Այս նախաձեռնությանը միացել են Աշխարհաքաղաքական ակումբը (ԱՄՆ), Հայդուկ միությունը (ԱՄՆ), Հայկական վերածնունդ կազմակերպությունը (ԱՄՆ) եւ Տեսակետ ակումբը (ԱՄՆ): Ի թիվս այլ բարձրաստիճան ոտսիկանների, այս կազմակերպությունների թիրախում է հայտնվել նաեւ Երեւանի նախկին ոստիկանապետ Աշոտ Կարապետյանը։
Այս մասին լսելիս՝ Աշոտ Կարապետյանը նախ ծիծաղեց, ապա պատասխանեց. «Ում են դիմո՞ւմ.... Ես հանգստանում եմ, բացարձակապես ինձ ոչինչ չի անհանգստացնում, ես հանգիստ եմ վայելում, ինձ մի անհանգստացրեք»։
Նախկին ոստիկանապետը այլ հարցերի չպատասխանեց։
Հիշեցնենք, որ Աշոտ Կարապետյանը պաշտոնանկ է եղել հուլիսի 30–31–ին խաղաղ ցուցարարների եւ լրագրողների նկատմամբ իրավապահների կատարած բռնությունների պատճառով։ Մինչեւ պաշտոնից հեռացվելը, նա խիստ նկատողություն էր ստացել։