Ներկայում Լեռնային Ղարաբաղում որոշակիորեն բացահայտ զինված հակամարտություն սկսելու՝ Ադրբեջանի ձգտումը, նախկինի համեմատ, նվազել է: NEWS.am-ի թղթակցի հետ զրույցում հայտարարեց Ռուսաստանի Դաշնային ժողոի Դաշնային խորհրդի պատգամավոր, ռուս-հայկական միջկառավարական հանձնաժողովի անդամ Իգոր Չեռնիշենկոն:
Նրա խոսքով՝ ռազմական գործողությունների վերսկսման հավանականությունը ներկայում ավելի քիչ է, քան 2-3 ամիս առաջ էր: «Հայաստանի եւ Ադրբեջանի նախագահներ Սերժ Սարգսյանի եւ Իլհամ Ալիեւի հետ հանդիպումներում Ռուսաստանի նախագահ Վլադիմիր Պուտինի վերջին հաջողությունները զգալիորեն նվազեցնում են Ղարաբաղում զինված հակամարտության հնարավորությունը»,- նշեց Իգոր Չեռնիշենկոն: Ըստ պատգամավորի՝ Ռուսաստանը հստակ սատարում է այն կարեւոր դերը, որը Հայաստանն ունի Անդրկովկասում:
Հիշեցնենք, որ ԼՂՀ պաշտպանության նախարար, ԼՂՀ ՊԲ հրամանատար, գեներալ-լեյտենանտ Լեւոն Մնացականյանը վերջերս տված հարցազրույցում հայտարարել էր, որ ռազմական գործողությունների վերականգնման հավանականություն միշտ կա, ավելին, այն բարձր է:
«Հակառակորդի այսօրվա պահվածքը թույլ է տալիս հանգել եզրակացության, որ նա առայժմ ամբողջությամբ չի հրաժարվել իր ծրագրերից: Այդ պատճառով ապագայում ցանկացած պահի ռազմական գործողությունների վերականգնումը հնարավոր է: Ամեն դեպքում, ապրիլյան պատերազմը որոշակի զսպող ազդեցություն ունեցավ հակառակորդի վրա: Դա երեւում է նաեւ նրա հայտարարություններից. եթե նախկինում ասում էին, որ 3 օրվա ընթացքում կհաղթանակեն, ապա հիմա նման հայտարարություններ այլեւս չեն հնչում, եւ ես հույս ունեմ, որ ընդհանրապես կհրաժարվեն իրենց ծրագրերից»,- ընդգծել է ԼՂՀ պաշտպանության նախարարը: