Քվեարկված ցուցակների հրապարակմամբ խախտվում է քաղաքացու ընտրական իրավունքը, կտրականապես դեմ եմ, որ հրապարակվեն ցուցակները։ NEWS.am–ի հետ զրույցում իշխող կուսակցության պատգամավոր Սուքիաս Ավետիսյանն այսպես է արձագանքել այն տեղեկություններին, որ իշխանությունը տապալել է Ընտրական օրենսգրքով ամրագրված վերահսկողական մեխանիզմների տեղադրումը եւ քննարկում է ցուցակների հրապարակման հավանականությունը։
«Ինչի պիտի հանրությունը իմանա՝ իմ ընտանիքի անդամները մասնակցեցին քվեարկությանը, թե չէ, բայց նաեւ մյուս տարբերակը ի սկզբանե առաջարկեցինք. հենց սկզբից ասեցինք՝ թող ձեր վստահված անձը տեղում վերցնի քվեարկողների ցուցակը ուսումնասիրի, համեմատի։ Ուրիշ բան է, երբ որ հրապարկվում է ցուցակը, մեկ այլ բան, որ դիտորդը ծանոթանա ցուցակներին ու համեմատի։ Հրապարակելուն դեմ եմ, ծանոթանալուն՝ չէ»,–ասել է պատգամավորը։
Հարցին՝ ինչո՞ւ իշխանությունը տապալեց իր իսկ կողմից հաստատած էլեկտրոնային համակարգի ներդրումը, առավել եւս, որ միջազգային դոնորները ֆինանսավորել էին, նշել է, թե սեպտեմբերի 1–ից պարզ կլինի՝ ինչն է իրականում ընդունվելու, ինչը՝ ոչ. «Դա կապ չունի, էլի հնարավարություն կա, որ ցանկացած տեղամասում իրենք կարողանան ցուցակները վերցնել, նայել, օգտագործել»։