Մոսկվայի հյուսիս-արեւելքում Ալտուֆյեւսկի մայրուղու վրա գտնվող պահեստում բռնկված հրդեհի հետեւանքով առնվազն 16 մարդ է զոհվել, հնարավոր է՝ նաեւ 20-ից ավելի, փոխանցում են ՏԱՍՍ-ի եւ «ՌԻԱ Նովոստի»-ի տեղեկատվական աղբյուրները: Հրդեհի մարումը մոտ երկու ժամ է տեւել: Քննչական կոմիտեն հայտնել է որ հրդեհը հրկիզման հետեւանք է:
Արտակարգ իրավիճակների ծառայություններում աղբյուրը հայտնել է. «Չորրորդ հարկում գտնվող արտադրական հատվածում կազմակերպվել է մարդկանց բնակեցում, որը դրա համար նախատեսված չէ: Կրակի մարման ընթացքում հայտնաբերվել է 20-ից ավելի դիակ: Նախնական տեղեկություններով՝ հրդեհի ժամանակ մարդիկ չեն կարողացել լքել շենքը»:
Քննչական կոմիտեն ժամը 10:43-ին պաշտոնապես հաստատել է 16 մարդու զոհվելու փաստը՝ հայտնելով գույքի դիտավորյալ վնասման հոդվածով հրդեհի փաստով քրեական գործի հարուցման մասին: Քննիչները, հրկիզումից բացի, դիտարկում են այլ վարկածներ եւս՝ ներառյալ կենցաղային եւ տեխնիկական:
