Գյումրու ավագանու ընտրություններում «Ասպարեզ» ակումբի հիմնադիր, «Ասպարեզ» օրաթերթի խմբագիր Լեւոն Բարսեղյանը կլինի Գաղափարակից լիբերալների ալյանս կուսակցության (ԳԱԼԱ) ավագանու անդամների թեկնածուների ցուցակում: Այս մասին հաղորդագրություն է տարածել ԳԱԼԱ կուսակցությունը։
Նշենք, որ ԳԱԼԱ–ի ավագանու թեկնածուների ցուցակը գլխավորում է կուսակցության ղեկավար Վահան Խաչատրյանը։
«Ավելի վաղ Լեւոն Բարսեղյանը հայտարարել էր, որ չի պատրաստվում քաղաքապետի պաշտոնի հավակնորդ լինել եւ ջանքեր է ներդնում որեւէ բարեխիղճ ընդդիմադիր դաշինքի ձեւավորման ուղղությամբ, որի թեկնածուական ցանկում դեմ չէր լինի ընտրվել որպես Գյումրու ավագանու անդամ: Այս եզրափակիչ հանդիպման ժամանակ արձանագրվեց, որ չնայած կողմերի եւ այլ կուսակցությունների ներդրած համառ ջանքերին` միացյալ հայտով որեւէ ընդդիմադիր դաշինք կազմել չհաջողվեց, սակայն մի քանի կուսակցություն պատրաստակամություն հայտնեցին պաշտպանել ԳԱԼԱ կուսակցությունը այս ընտրություններում:
Կողմերն արձանագրեցին նաեւ, որ չնայած մի շարք հարցերում պահպանված մի քանի տարաձայնություններին եւ մոտեցումների տարբերությանը` Գյումրու տեղական ինքնակառավարման համակարգը կարիք ունի անհետաձգելի բարեփոխման. այս մակարդակում եւս կարիք կա քաղաքացիների շահերի անզիջում պաշտպանության, արդյունավետ կառավարում իրականացնելու եւ կոռուպցիոն ռիսկերը նվազեցնելու»,–նշված է հաղորդագրության մեջ: