Լեհ Պյոտր Մալախովսկին, որը Ռիո դե Ժանեյրոյում արծաթե մեդալակիր է դարձել սկավառակների նետման մարզաձեւում, վաճառել է իր մեդալը, որպեսզի օգնի երեք տարեկան տղային, որը տառապում է ռետինոբլաստոմայով՝ աչքի ցանթաթաղանթի չարորակ ուռուցքով, հայտնում է Newsru-ն:
Ավելի վաղ Մալախովսկին սոցցանցի իր էջում հայտնել էր, որ 2016-ի Խաղերից հետո իրեն է դիմել երեք տարեկան Օլեքի մայրը, որը պայքարում է քաղցկեղի դեմ ու Նյու Յորքւոմ բուժվելու կարիք ունի, ինչը ծնողները չեն կարող իրենց թույլ տալ: Բուժման համար գումար հավաքելու նպատակով 33-ամյա մարզիկը աճուրդի է դրել իր արծաթե մեդալը, որը Ռիոյում էր նվաճել :
«Օլիմպիական խաղերում մեդալ նվաճելը յուրաքանչյուր մարզիկի կյանքի գլխավոր երազանքն է: Իհարկե բոլորը ուզում են ոսկե մեդալ նվաճել, ու ես արեցի այն ամենն, ինչ իմ ուժերի սահմանում էր, որպեսզի նվաճեմ այն: Ցավոք այս անգամ ինձ չհաջողվեց, բայց ճակատագիրը ինձ հնարավորություն տվեց ավելացնել իմ արծաթե մեդալի արժեքը»- գրել է Facebook –ում Մալախովսկին:
Շուտով մարզիկը հայտնել էր, որ գտել է գնորդների, որոնք ուզում են ձեռք բերել մեդալը: Մալախովսկին չի հայտնել մեդալի գինը, բայց լրատվամիջոցների տվյալներով այդ գումարը բավականացրել է երեխայի բուժման կուրսի դիմաց վճարելու համար, որը 130 հազար դոլար արժե: