«Սասնա ծռեր» խմբի անդամ, անազատության մեջ գտնվող Արամ Մանուկյանին երկուշաբթի՝ օգոստոսի 29-ին կվիրահատեն: Այս մասին NEWS.am-ին ասաց նրա պաշտպան Ինեսսա Պետրոսյանը:
«Օգոստոսի 29-ից սկսում են վիրահատությունները: Առաջինը կվիրահատեն Արամ Մանուկյանին: Որոշվել է, որ նրան կվիրահատեն «Էրեբունի» ԲԿ-ում»,- ասաց պաշտպանը՝ նշելով, որ Արամ Մանուկյանի վիրահատությանը կհաջորդեն «Սասնա ծռեր» խմբի մյուս անդամների վիրահատությունները:
Ինեսսա Պետրոսյանը, որն իրականացնում է նաեւ Արամ Մանուկյանի հոր՝ Պավել Մանուկյանի պաշտպանությունը, նշեց, որ նա փորձել է քայլել, որոշ չափով հաջողվել է:
«Հենակներով փորձել է քայլել: Դե վիրավոր ոտքը գետնին դնելը մեծ խնդիր է»,- ասաց նա:
Արամ Մանուկյանին մեղադրանք է առաջադրվել Քրեական օրենսգրքի 219-րդ հոդվածի 3-րդ մասով, որը սահմանում է շենքեր, շինություններ, տրանսպորտի, հաղորդակցության կամ կապի միջոցներ զավթելը և 235-րդ հոդվածով` ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը:
Արամ եւ Պավլիկ Մանուկյանները ոտքերի հատվածում հրազենային վիրավորում էին ստացել ՊՊԾ գնդում տեղի ունեցած փոխհրաձգության ժամանակ:
