Շիրակի մարզի Կառնուտ գյուղի մոտ ջրամբարն ընկած մեքենայի ուղեւորը եւ վարորդը քնած են եղել, երբ մեքենան շարժվել է, հայտնվել ջրամբարում։ Այս մասին NEWS.am-ի հետ զրույցում ասաց Կառնուտի գյուղապետ Արծրուն Գաբոյանը։
«Մեքենան կանգնեցրել են ջրամբարի մոտ, փոխանցման տուփը «խոլոստոյ» է եղել, շարժվել է, հայտնվել ջրամբարում»,- ասաց գյուղապետը՝ նշելով, որ իր տեղեկություններով՝ տղամարդիկ նաեւ ալկոհոլ են օգտագործած եղել։
Մեքենայի վարորդը մահացել է, ուղեւորը դուրս է եկել մեքենայի միջից։
Տղամարդիկ Շիրակի մարզի Շիրակավան գյուղից են։ Շիրակավանի գյուղապետ Մարատ Մկրտչյանը NEWS.am-ի հետ զրույցում ասաց, որ մահացած 60-ամյա տղամարդը, ընտանիք, թոռներ ունի։ Նա իր ընկերոջ հետ գնացել էր ջրամբարից ձուկ որսալու։
Ավելի վաղ NEWS.am-ը հայտնել էր, որ օգոստոսի 28-ի գիշերը «Գազ 3110» մակնիշի ավտոմեքենան դուրս է եկել ճանապարհի երթեւեկելի հատվածից ու ընկել ջրամբարը։ Վարորդը՝ 1956 թ. ծնված Ա. Թ.-ն տեղում մահացել է, իսկ ուղեւորը՝ 1969 թ. ծնված Ա. Բ.-ն մինչեւ փրկարարների հասնելը ինքնուրույն դուրս է եղել ավտոմեքենայից։
