Սարի թաղի գործով մեղադրյալ Գարիկ Առուստամյանը, որը մեկ ամիս է՝ կալանքի տակ էր, կալանավայրում առողջական խնդիրներ է ձեռք բերել։ Այս մասին NEWS.am-ի հետ զրույցում ասաց Գարիկը։
«Նյարդային վիակիցս մաշկի հերպես է առաջացել մոտս։ Քրեակատարողական հիմնարկում բժիշկ կանչեցին, դեղեր նշանակեց, հիմա նորից պետք է բժշկի դիմեմ, բուժում ստանամ»,- ասաց նա։
Հիշեցնենք, որ Գարիկ Առուստամյանը մեկ ամիս կալանքի տակ մնալուց հետո օգոստոսի 26-ին Վերաքննիչ քրեական դատարանի որոշմամբ ազատ արձակվեց։
Արարատի մարզի Նիզամի գյուղում բնակվող Գարիկը, հարազատների պատմելով, ընկերոջ հետ գնացել էր Սարի թաղ՝ քրոջը տուն բերելու, երբ հայտնվել էր իրադարձությունների կենտրոնում: Ընկերը՝ Պետրոս Խաչատրյանը NEWS.am-ի հետ զրույցում պատմել էր, որ ոստիկաններն իրենց թույլ չեն տվել մեքենայով դուրս գալ Սարի թաղից, դուրս են բերել մեքենայի միջից, ծեծի ենթարկել թե իրենց երկուսին, թե Գարիկի քրոջը, ինչից հետո Գարիկը երկու օր անցկացրել էր վերակենդանացման բաժանմունքում, ապա կալանավորվել:
Գարիկ Առուստամյանին մեղադրանք է առաջադրել Քրեական օրենսգրքի 225-րդ հոդվածի 2-րդ մասով, այն է՝ զանգվածային անկարգությունների ժամանակ դրանց մասնակցի կողմից բռնություն գործադրելը, ջարդ կամ հրկիզում իրականացնելը, գույք ոչնչացնելը կամ վնասելը, հրազեն, պայթուցիկ նյութեր կամ պայթուցիկ սարքեր գործադրելը կամ իշխանության ներկայացուցչին զինված դիմադրելը, որը պատժվում է ազատազրկմամբ` երեքից ութ տարի ժամկետով:
Գարիկը պնդում է, որ պատահաբար ավտոմեքենայով ոստիկաններից մեկի ոտքն է վնասել, բայց վնասվածն այնքան թեթեւ է եղել, որ ոստիկանները ամբուլատոր բուժօգնություն ստանալուց հետո դուրս են գրվել, իսկ ինքը նրանց հասցրած հարվածներից լուրջ վնասծաներ էր ստացել, երկու օր անցկացրել վերակենդանացման բաժանմունքում։