Ավստրալիայի առեւտրային հանձնաժողովը, որը պատասխանատու է առեւտրի, ներդրումների եւ կրթության հարցերի համար, ինչպես նաեւ Պաշտպանության նախարարության գիտատեխնիկական բաժինը հաքերային հարձակման են ենթարկվել, հաղորդում է ABC հեռուստաալիքը՝ վկայակոչելով երկրի հետախուզական ծառայությունների իր աղբյուրը:
Երկրի վարչապետի՝ կիբերանվտանգության հարցերով խորհրդական Ալասթեր ՄաքԳիբոնը հայտարարել է, որ Ավստրալիայի կառավարությունը «ամեն օր հաքերային հարձակման է ենթարկվում»:
Կառավարական գերատեսչությունների համակարգիչների վրա հարձակումների մեջ, որոնք իրականացվում են վերջին 5 տարիներին, իշխանությունները հակված են կասկածել Չինաստանի հաքերներին, հաղորդում է հեռուստաալիքը: Ավստրալիայում Չինաստանի դեսպանատունը հերքել է այդ մեղադրանքները՝ դրանք անվանելով «բացարձակ անհիմն» եւ «հիմնված սխալ կարծրատիպի վրա»:
Հեռուստաալիքը նաեւ նշում է, որ հաքերային հարձակումների են ենթարկվել նաեւ Newsat Ltd արբանյակային կապի խոշոր ընկերությունը եւ Ավստրալիայի օդերեւութաբանական բյուրոն: