Բելգիայի արդարադատության նախարարությանն առընթեր քրեագիտության ազգային ինստիտուտի լաբորատորիաներից մեկը վնասվել է այն պայթյունի հետեւանքով, որը անհայտ անձինք էին կազմակերպել օգոստոսի 29-ի գիշերը ինստիտուտի տարածքում, հայտնում է RTL հեռուստառադիոընկերությունը ՝ վկայակոչելով հաստատության աշխատակիցներին, հայտնում է «ՌԻԱ Նովոստին»:
RTL-ի տեղեկություններով ավտոմեքենան ժամը մոտ 03:30-ին բախվել է ինստիտուտի տարածքի մուտքի մոտ երեք պատնեշների, կանգնել կայանատեղիում, իսկ հետո մեկ կամ մի քանի կասկածյալներ լաբորատորիաներից մեկի մոտ ռումբ են դրել ու պայթեցրել: Ինստիտուտի աշխատակիցներից մեկի խոսքով, լաբորատորիան, որտեղ ԴՆԹ հետազոտություններ են կատարվում, զգալիորեն վնասվել է: Ընդ որում բուն ինստիտուտում պայթյունի պահին ոչ մեկը չի եղել:
Ինչպես իր Twitter –ում հայտնել է արդարադատության նախարար Կուն Հենսը, խոսքը հանցավոր հրկիզման մասին է, հետաքննությունը իրականացնում է Բրյուսելի դատախազությունը: «Առայժմ վաղաժամ է եզրակացություններ անելու համար»- գրել է նախարարը:
Այդ կապակցությամբ RTL-ը հայտնել է, որ խոսքը կարող է լինել թե ահաբեկչության, թե ապացույցները ոչնչացնելու փորձի մասին:
Բելգիայում մարտի 24-ից գործում է ահաբեկչական սպառնալիքի բարձր մակարդակ՝ երրորդը չորս հնարավորներից: Չորրորդ մակարդակը ներդրվել էր Բրյուսելի օդանավակայանում ու մետրոյում մարտի 22-ին կատարված ահաբեկչությունների օրը, իսկ երկու օր հետո այն իջեցվել էր «երեք» նիշի, որը ենթադրում է ահաբեկչության հնարավոր ու հավանական վտանգ:
