ԼՂՀ Քարվաճառ շրջկենտրոնում արդեն 16 օր ջուր չկա: Այս մասին այսօր՝ օգոստոսի 29-ին, NEWS.am-ի հետ զրույցում ասաց Քարվաճառի բնակիչ Ալեքսանդր Քանանյանը: Նա նշեց, որ ջուր չլինելու հետեւանքով քաղաքում ստեղծվել է ծանր կենցաղային եւ սանիտարական իրավիճակ։ Քանանյանի խոսքով՝ խմելու եւ ոռոգման ջրի պակասի հետեւանքով ծանր վնասներ են կրել նաեւ տնամերձ հողամասերը:
«16 օր ջուր չունենք, սակայն, պետությունը չի կազմակերպում բնակիչների ջրի մատակարարման հարցը: Խմելու ջրի ամենամոտիկ աղբյուրը քաղաքից մի քանի կմ հեռու է՝ Տրտուի ափին, որը գտնվում է 200 մետր խորությամբ ձորում: Այսինքն՝ այնտեղից ջուր բերելը շատ դժվար է: Մեր ջուրը գալիս էր Ծարի ժայռապարը հարավ-արեւմուտքից երիզող Գեղախաչ գետից, որը վնասվել է Ծարի կարճ ճանապարհի մաքրման աշխատանքների ժամանակ: Այստեղ է եկել նաեւ ԼՂՀ քաղաքաշինության նախարարության ջրամատակարարման գծով փոխնախարարը, խոստացել, որ ամեն ինչ կարվի խնդրի լուծման համար, սակայն, արդեն երկու շաբաթ է անցել, դեռեւս ոչինչ չի արվել»,-ասաց նա:
ԼՂՀ Քաղաքաշինության նախարարությունից NEWS.am-ին տեղեկացրին, որ առաջին իսկ օրվանից սկսվել են վերանորոգման աշխատանքները, սակայն, դեռ հստակ չեն կարող ասել, թե երբ կավարտվեն դրանք:
«Ջրամատակարարման գծով փոխնախարար Գեորգի Հայիրյանը տեղում ծանոթացել է իրավիճակին եւ հանձնարարել անհապաղ սկսել վերանորոգման աշխատանքները: Վթարային իրավիճակ է ստեղծվել, խողովակները փոխելու անհրաժեշտություն կա: Նոր խողովակաշար է տեղադրվում այժմ, սակայն, դեռ պարզ չէ, թե վերանորոգման աշխատանքները երբ կավարտվեն, ստուգելով գնում են՝ որտեղ կա վթարային իրավիճակ, վերանորոգում եւ անցնում են առաջ»,- ասաց ԼՂՀ Քաղաքաշինության նախարարության տեղեկատվության եւ հասարակայնության հետ կապի բաժնից: