Քարնեգի-Մելլոնի համալսարանի հետազոտողները սկսել են այնպիսի պոլիմերներ մշակել, որոնք ի վիճակի են ոչնչանալ մինչեւ մոնոմերներ էլեկտրական ազդակի ազդեցության տակ:
N+1-ը, վկայակոչելով Aviation Week-ին, գրում է, որ նախատեսված է նման պոլիմերներն օգտագործել «անհետացող» պարաշյուտների մշակման գործում, որոնք ինքնաթիռից բեռը կամ մարտիկին գետին իջեցնելու հետո շատ արագ եւ գործնականում անհետ կքայքայվեն:
Էլեկտրականության միջոցով քայքայվող պոլիմերի մշակումն իրականացվում է որպես ICARUS ծրագրին կից նախագիծ: Քարնեգի-Մելլոնի համալսարանի հետազոտողները հայտնել են, որ արդեն ստեղծել են անհրաժեշտ պոլիմերը, բայց առայժմ չեն կարողացել դրանից թելերի եւ հյուսվածքների ստեղծման տեխնոլոգիա մշակել: Ինքը` պոլիմերը բավականին կայուն է, որպեսզի դրանից պատրաստված պարաշյուտը դիմանա ծանրաբեռնվածությանը եւ կարողանա բեռն անվտանգ գետին հասցնել:
Նախնական գնահատականի համաձայն, եթե հետազոտողներին հաջողվի պոլիմերից այնպիսի թելեր ստեղծել, որոնք կարողանան իրենց միջով էլեկտրական հոսանք անցկացնել եւ դրա ազդեցությամբ «անհետանալ», ինքը` ամբողջ պարաշյուտի «անհետացման» գործընթացը 20 րոպեից երկու ժամ կտեւի: