Վանաձոր քաղաքի «Անօդ» էլեկտրոտեխնիկական ընկերությունը հույս ունի, որ «Գազպրոմ Արմենիան» չի հրաժարվի իրենց մշակումից: Այս մասին NEWS.am թղթակցին հայտնել է «Անօդ» ԲԲԸ տնօրեն Սամվել Օսյանը:
2015-ին ընկերությունը նախապես պայմանավորվել էր «Գազպրոմ Արմենիա»-ի հետ՝ ստորգետնյա խողովակաշարերի համար հակակոռոզիոն կայաններ մատակարարելու մասին:
Այս պատվերն ընկերությանն օգնել է աջակցություն ստանալ ՝ Համաշխարհային բանկի ծրագրի շրջանակում Ձեռնարկությունների ինկուբատոր հիմնադրամի (EIF) դրամաշնորհային ծրագրի միջոցով:
«Մեր սարքերի որոշ մասը «Գազպրոմ Արմենիան» գնել է, բայց հետո նրանք պարզաբանել են, որ «Գազպրոմը» հետեւում է ներմուծման փոխարինման քաղաքականությանն ու հնարավորության դեպքում ռուսական արտադրութան սարքավորումներ է գնում, այդ թվում դուստր ձեռնարկություններից: Ռուսաստանում դա հասկանալի է, բայց մեկ այլ երկրում, հավանաբար, պետք է հաշվի առնել նաեւ տեղի արտադրողների շահերը: Եվ հետո չէ՞ որ մենք ԵՏՄ անդամ պետություն ենք, հետեւաբար, ըստ էության, այդքան էլ օտար չենք»- նկատեց Օսյանը:
Վանաձորը խորհրդային ժամանակներում եղել է քիմիայի ու մեքենաշինության կենտրոն: Հիմա այդ ձեռնարկություները գրեթե ամբողջովին փակվել են: Ոչինչ չի մնացել նաեւ այն գործարանից, որտեղ աշխատում էր Օսյանը՝ «Ավտոմատիկա» գիտաարտադրական միավորումից: 80-ականներին անտեղ ստեղծվել էր ռոբոտաշինության հանգույց, ու ձեռնարկությունը ՀՍՀՄ-ում դարձել էր արդյունաբերական ռոբոտների արտադրության ոլորտի առաջատար:
90-ականներին, երբ անհետացան եւ՛ արդյունաբերությունը, եւ՛ ռոբոտները, Օսյանը հավաքեց մի քանի նախկին գործընկերների, որպեսզի աշխատեն՝ եթե ոչ մշտապես, ապա գոնե պատվերից պատվեր: Խոշոր գործարաններ հիմիկվա Լոռիի մարզում արդեն գրեթե չեն մնացել ու «Անօդ» ընկերությունը սպասարկում է փոքր ու միջին ձեռնարկությունները ՝ հավաքում է ավտոմատիզացման համակարգեր կաթի պաստերիզացման ու փռերի համար, ավտոմատ ջերմակարգավորիչներ՝ աղյուսի թրծման վառարանների համար, սանիտարական անցակետեր սննդի ձեռնարկությունների համար եւ այլն:
«Հույս ունենք, որ շուտով կկարողանանք կատարել այն պատվերի գոնե մի մասը, որին երկար պատրաստվել ենք: Դա եւ՛ մեր քաղաքին մի քիչ կօգնի աշխատատեղերի հարցում, եւ՛ կօգնի աջակցել մեր երկրի գազաբաշխիչ ցանցին»,- հավելեց Օսյանը:
