Կենտրոնական ընտրական հանձնաժողովն այսօր՝ օգոստոսի 29-ին, հրավիրված արտահերթ նիստում չեղյալ է համարել 2016թ. հունիսի 30-ին ԱԺ-ի կողմից ընդունված Ընտրական օրենսգրքի փոփոխությունների օրինագիծը, քանի որ նշված փոփոխությունների համար անհրաժեշտ տեխնիկական միջոցները, ըստ Կառավարության գրավոր պատասխանի, նշված ժամկետում հնարավոր չի եղել ապահովել։
Հիշեցնենք, որ նախատեսված էր տեխնիկական միջոցների տեղադրումը սկսել սեպտեմբերի 1-ից, սակայն վերջին օրերին հայտնի դարձավ, որ 4+4+4 ձեւաչափով քննարկումների արդյունքում ձեռք բերված եւ Ընտրական օրենսգրքում ընդգրկված այդ վերահսկողական մեխանիզմները չեն գործելու։
Ավելի վաղ NEWS.am-ը հայտնել էր, որ տեխնիկական միջոցների համար անհրաժեշտ 16 միլիոն եվրոն միջազգային դոնորները խոստացել էին տրամադրել, սակայն իշխանությունը գործընթացն այնքան է ձգձգել, մինչեւ տապալվել է։ Ընդդիմությունն ու իշխանությունը այժմ բանակցում են քվեարկված ցուցակների հրապարակման հարցի շուրջ, ինչին կարծես թե իշխանությունը դեմ չէ, սակայն ընդդիմությունը պնդում է, որ խստացվի իրավական պատասխանատվությունը։