Վերաքննիչ քրեական դատարանն այսօր՝ օգոստոսի 29-ին կայացած նիստերով մերժել է «Հիմնադիր խորհրդարանի» առաջնորդ Ժիրայր Սեֆիլյանի եւ «Սասնա ծռեր» խմբի անդամ Գագիկ Եղիազարյանի կալանքը վերանայելու բողոքները։
Նշենք, որ մեծ թվով քաղաքացիներ հավաքվել էին Վերաքննիչ քրեական դատարանի առջեւ։ Հավաքված քաղաքացիները եկել են «Հիմնադիր խորհրդարանի» առաջնորդի լուսանկարով պաստառներով եւ վանկարկում են «Ազատություն Ժիրոյին»:
Հիշեցնենք, որ այս տարվա մայիսին քրեական գործ էր հարուցվել, որի շրջանակում մեղադրանք էր առաջադրվել Ժիրայր Սեֆիլյանին եւ եւս 8 անձանց: Սեֆիլյանը մեղադրվում էր մի խումբ անձանց միջոցով զենքի ապօրինի շրջանառություն կազմակերպելու մեջ: Օգոստոսի սկզբին Սեֆիլյանի գործը միացվել էր «Սասնա ծռեր»-ի գործին: Նրան այժմ մեղադրանք է առաջադրվել Քրեական օրենսգրքի 35-225-րդ եւ 38-235-րդ հոդվածներով:
Գագիկ Եղիազարյանը, ըստ քննության, ոստիկաններին էր հանձնվել հուլիսի 27-ին։ Նրան առաջադրվել էր մեղադրանք ՀՀ ՔՕ-ի 219-րդ հոդված 3-րդ մասի 1-ին կետով (Կազմակերպված խմբի կողմից՝ շենքեր, շինություններ, տրանսպորտի, հաղորդակցության կամ կապի միջոցներ զավթելը) եւ 235-րդ հոդվածի 3-րդ մասով (Կազմակերպված խմբի կողմից՝ ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը):