Վրաստանի տարածքով Ռուսաստանը եւ Հայաստանը միացնող գազատարի պայթյունի փորձի գործով մեղադրվողներից մեկն 50 հազար դոլարի փոխանցման էր սպասում. ենթադրվում է, որ գումարը փոխանցվելու էր Թուրքիայից: Այս մասին հայտնել է «Քվիրիս պալիտրա» թերթը՝ վկայակոչելով Վրաստանի Պետանվտանգության ծառայությունում իր աղբյուրին: Խոսքը Բեքա Բեքաուրիի մասին է:
Օգոստոսի 22-ին Պետանվտանգության ծառայությունը հաղորդել էր ահաբեկչության նախապատրաստման գործի բացահայտման եւ յոթ մարդու կալանավորման մասին, այդ թվում՝ պարեկային ոստիկանության աշխատակցի: Ձերբակալվածները պատրաստվում էին պայթեցնել այն գազատարը, որով Ռուսաստանից բնական գազ է մատակարարվում Հայաստան: Նրանք գտնվում են նախնական պահման խցերում:
«Զրույցի ժամանակ ես նրան հարցրել եմ, թե ում հանձնարարությունն էր կատարում եւ ով է ֆինանսավորել: Բեքաուրին այդ հարցին հոդաբաշխ պատասխան չի տվել, սակայն ասել է, որ արտասահմանից 50 հազար դոլարի էր սպասում, իսկ հետո լեզվի սայթաքում թույլ տալով ասել է՝ ենթադրաբար Թուրքիայից: Թե ով էր պատվիրատուն, Բեքաուրին կոնկրետ չի ասել»,- աղբյուրի խոսքն է մեջբերել թերթը: