Ստեփանակերտում հունիսի 6-ին ԼՂՀ Ազգային ժողովի ընդդիմադիր պատգամավոր Հայկ Խանումյանին ծեծի ենթարկելու դեպքով հարուցված քրեական գործը կարճվել է: Այս մասին NEWS.am-ի թղթակցին ասաց Խանումյանի փաստաբան Հայկ Ալումյանը:
«Համաներումով ազատ կարձակվեն մեղադրյալները: Մենք բողոքարկելու ենք այս որոշումը նախ այստեղ, ապա դիմելու ենք Եվրոպական դատարան: Կունենանք վճիռ եւ հերթական անգամ հերթական վարչապետը հերթական արդարադատության նախարարին հանձնարարություն կտա՝ պարզելու, թե ում մեղքով ՄԻԵԴ-ում գրանցվեց հերթական պարտությունը»,- ասաց Հայկ Ալումյանը:
Ըստ փաստաբանի՝ տեղի ունեցածը զարհուրելի է, քանի որ ցերեկով Ստեփանակերտի կենտրոնում՝ Ազգային ժողովի մոտ, ծեծում են պատգամավորի, ապա մեղավորներին համաներումով ազատ արձակում:
Հիշեցնենք, որ Արցախի Հանրապետության անկախության 25-ամյակի առթիվ համաներում էր հայտարարվել: Դրանից հետո Խանումյանին ծեծի ենթարկելու դեպքով հարուցված քրգործը վերաորակվել էր՝ առեւանգումից դառնալով խուլիգանություն: Ըստ Խանումյանի՝ սա արվել էր, որ համաներումը տարածվի նրանց վրա:
Ավելի վաղ հայտնել էինք, որ Հայկ Խանումյանին ծեծել են 2016 թվականի հունիսի 6-ին: Այս գործով երեք մեղադրյալ կա, բոլորն էլ կալանավորված են: Նրանցից երկուսը Ստեփանակերտից են, մեկը` Երեւանից: