Հնդկաստանում Գանգեսի վարարման հետեւանքով առաջացած ջրհեղեղը գերազանցել է նախորդ տարիների ջրի մակարդակի ռեկորդները, փոխանցում է BBC–ն։
Երկրի հյուսիսում գտնվող Փաթնեում (Բիհար նահանգի մայրաքաղաք) ջրի մակարդակը հասել է 50,52 մետրի (1994 թվականի 50,27 մետրի համեմատությամբ), ռեկորդային են եղել նաեւ Ութար–Փրադեշ նահանգի ցուցանիշները։
Այս տարի Հնդկաստանում ջրհեղեղները ավելի քան 150 մարդու կյանք են խլել, հազարավոր մարդիկ զրկվել են տանիքից։
Աշխարհում մեծությամբ երրորդ գետը ամեն տարի անձրեւների սեզոնին վարարում է։ Փորձագետներից ոմանք ջրհեղեղների պատճառ են համարում տիղմը։ Նրանց կարծիքով՝ տիղմն ավերում է ափերը, եւ ջուրը, խոչընդոտների չհանդիպելով, հեղեղում է շրջակա բնակավայրերն ու գյուղատնտեսական հանդերը։
