Եվրախորհրդարանի «Եվրոպական ազատ դաշինքը» համագործակցում է Լեռնային Ղարաբաղի Հանրապետությունից պատգամավորների հետ: Այս մասին NEWS.am-ի թղթակցի հետ զրույցում նշեց Լատվիայից Եվրախորհրդարանի պատգամավոր, «Կանաչներ/Եվրոպական ազատ դաշինք» խմբակցության անդամ Տատյանա Ժդանոկը:
«Ազգային փոքրամասնությունների պաշտպանության կողմնակիցների համար միշտ դժվար է ձայն հավաքել: Օրինակ՝ Լատվիայում ընտրողների կեսը զրկված է ձայնի իրավունքից (ռուսալեզու բնակչությունը, որի շրջանում մեծ է Հանուն մարդու իրավունքների միացյալ Լատվիայում կուսակցության կողմնակիցների թիվը - խմբ.):
Ղարաբաղի հարցով անձամբ ես փոքր-ինչ այլ դիրքորոշում ունեմ, քան իմ որոշ գործընկերներ: Թեկուզ այն պատճառով, որ նշված խմբակցության անդամ եմ»,- նշեց Ժդանոկը:
«Կանաչներ/Եվրոպական ազատ դաշինք» խմբակցության ներսում Դաշինքը զգալի ինքնավարություն ունի, իսկ մի շարք դեպքերում, ըստ պատգամավորի, առանձին դիրքորոշում:
Մասնավորապես, Դաշինքն իր վերջին համագումարներին Լեռնային Ղարաբաղից ներկայացուցիչների է հրավիրել, այդ թվում՝ 2014 թվականին Իսպանիայի Սանտյագո դե Կոմպոստելլա քաղաքում անցկացված համագումարին: Ըստ Ժդանոկի՝ քննարկվում է նաեւ Դաշինքին արցախցի խորհրդարանականների պոտենցիալ անդամակցության հարցը:
«Ամեն դեպքում՝ նրանց հետ միջկուսակցական կապեր ենք պահպանում»,- նշեց պատգամավորը:
Հիշեցնենք, որ երկար տարիներ Տատյանա Ժդանոկը զբաղվում է Լատվիայի ռուսալեզու բնակչության իրավունքների պաշտպանությամբ, «Հանուն մարդու իրավունքների միացյալ Լատվիայում» կուսակցության համանախագահն է:
