58-ամյա Եղիշե Խաչատրյանի (հայտնի լեզվաբան Փառանձեմ Մեյթիխանյանի ամուսնու) սպանության մեջ մեղադրվող Յուրի Հակոբյանը դեպքի ժամանակ այլ վայրում է եղել, ինչն էլ նրա ալիբին է: Այս մասին NEWS.am-ի հետ զրույցում ասաց նրա պաշտպան Արմեն Նադիրյանը:

«Հստակ այլուրեքություն է ներկայացրել: Ասել է` ես գտնվել եմ այսինչ վայրում 23:00-ից սկսած, 23:40-ին հասել եմ մի ուրիշ վայր: Հիմա այդ մյուս վայրի տեսախցիկները ֆիքսել են նրան: Մյուս փաստն էլ, ասում ենք, ճշտելու համար, թող հարցաքննեն այդ վայրում գտնվողներին»,- ասաց պաշտպանը:

Արմեն Նադիրյանի խոսքով` միայն երկու ամիս անց են հարցաքննվել այդ անձինք: Իրենք ենթադրում են, որ այդ ցուցմունքներով հաստատվել է Յուրի Հակոբյանի այլուրեքությունը:

«Եթե քննչական մարմինը որպես հիմնավոր կասկածի հիմք չի ներկայացնում այդ հանգամանքը, այլ միայն տուժողի մոր ցուցմունքը, դրանից ենթադրում ենք, որ այլուրեքության հանգամանքը գոնե ցուցմունքներով հաստատվել է»,- ասաց պաշտպանը: 

Հիշեցնենք, որ հունիսի 4-ին, ժամը 23-ին, «Ֆորդ Տրանզիտ» մակնիշի ավտոմեքենայի վարորդ, 1958 թ. ծնված Եղիշե Խաչատրյանի եւ ճանապարհատրանսպորտային երթեւեկության կանոնները խախտած ավտոմեքենայի վարորդի եւ ուղեւորների միջեւ Նուբարաշենի խճուղու թիվ 1/5 հասցեի մոտ տեղի էր ունեցել վիճաբանություն, որի ընթացքում ստացած մարմնական վնասվածքներից Եղիշե Խաչատրյանը մահացել էր:

Սպանության մեջ մեղադրվում են Արարատ Նիկողոսյանը, Արտաշես Չիչոյանը, Խաչիկ Կոսյանը եւ Յուրի Հակոբյանը: